新地第一鎗
2013/10/7 上午 09:34:32
網誌分類: 經濟
美國政客繼續「玩嘢」，預算案僵局持續，政府非核心部門繼續關閉。據舊金山聯儲銀行行長威廉姆斯估計，政府關門兩星期，美國第四季度GDP增長將減少0.25個百分點。
政府關門亦令就業數據無法推出，高盛估要政府開番工後一星期才出數據，若聯儲局開會前仍無數據，即係話無依靠可以收水。唔知係唔係因為收水無期，美股上周五有進賬，杜指漲76點至15073點，漲幅為0.5%；而標普500指數升12點，造1691點，漲幅0.7%。總結全個星期，杜指跌1.2%，標普500指數靠穩，只係微跌0.1%，納指則繼續造好，逆市漲0.7%。
美股整體表現仍然不俗，再加上，股市恐懼指標VIX指數17.67的近期高位回落到16.7，以及美國10年期債收益率長期維持在2.6厘水平，反映市場對於現時的預算僵局，以至即將到來的美國債務上限問題，又唔係睇得咁悲觀，認為這只不過是政客「做騷」，最終仍會於今個月17日的債務上限「死線」前達成協議。
有「債券大王」之稱的太平洋投資管理公司總裁格羅斯(Bill Gross)與貝萊德公司的芬克(Larry Fink) 上周五就異口同聲地表示，「政府關門將得到解決，也不會出現債務違約。」格羅斯認為，這只不過政客的一場戲而已。
瑞銀(UBS)的紐交所操作主管Art Cashin 上周解釋兩黨議員之所以遲遲都唔願意埋意協商，主要係因為兩黨相爭，各黨派的支持者會「科」水(partisan donations)支持他們。相方爭拗愈「激烈」，即係戲份愈交得足，收入就愈多啦。政客當然唔會咁笨，咁快停玩。Cashin預測，當水源差唔多「乾涸」，政客就會開「為民請命」。當然，月中就係債務上限死線，政客亦唔敢玩得太過火，鑊太大，衰唔起也。
美國預算危機拖住，但香港樓價卻有「突破」，不過係向下嗰隻。在新世界(0017)
與會德豐(0020)推售柯士甸站新盤The Austin前夕，新地(0016)出手截擊，公開九龍站天璽181夥價單，平均實用面積呎價29,098元，呢個價比年初部份二手單位成交價低10%，新地更送出補貼七成買家印花稅(BSD)及一般印花稅等，以樓價2000萬元以上的單位為例，應付稅額高位為樓價23.5%，新地將會回贈樓價16.45%，再加減價等各種優惠，內地人買樓變相劈價三成幾(本地人買樓唔使俾買家印花稅等如減少啲)。 各種古靈精怪優惠計哂後，天璽平均實呎約20000元，估計建築呎價15000左右，西九豪宅由顛價跌落凡間。
政府連番推出打擊措施，新地差不多成年無賣樓，今次一來就劈價，好明顯係睇淡，認為如果唔搶在柯士甸站新盤The Austin前出手，自己唔減人地都會減，人地減完賣完吸乾客源，怕減價都賣唔到，不如自己減先。要觀察新地賣樓的去貨情況，但目前二手賣樓限制多多，即使熱賣都唔會有二手賺錢成交，所以好難掀起熱潮，若減咁多都去得唔好，仲死多二錢。
新地打嚮第一鎗，預計發展商減價去貨得更狼，二手本來已靜，更會被一手搶哂啲客，唔大劈價好難沽樓，恐怕樓市會形成反覆向下之勢。
陸羽仁
回應(10) 我想回應
陸羽仁 BLOG 舊文