金融High Tea 2014年4月8日
小心二強
2014年04月08日
上星期美股創新高後急調，港股預咗會衰，恒指跌百零點，數字上睇唔係咁差，市底唔係太弱，但散戶焦點係科網同濠賭二強板塊，都幾唔靚仔。股王騰訊(700) 一度跌穿大牛價，以一隻萬億市值嘅公司嚟講，一個月跌成三成，確係幾誇張！
微博集資被唱淡
騰訊一股高位646元，買一手要成六萬幾元，好早已經唔係散戶嗰杯茶，不過，好多散戶唔炒騰訊，但唔代表唔炒科網股，呢個板塊仲有好多真假科網股份當炒，佢哋都係睇住騰訊同阿里巴巴嘅影子股嚟炒，家龍頭回落，其他股份都無運行，跟紅頂白的短炒遊戲，暫時就唔係咁好玩嘞。
記得騰訊係個幾月前炒到火紅火綠，大行鬥調高目標價之時，有投行發出行使價1000元的騰訊價外輪，當時陸羽仁係網誌叫過大家留神，因為投行發衍生工具發到最開巷，證明隻股炒得好熱，家睇番，當日差唔多係騰訊股價摸頂的時候，之後騰訊派業績，宣佈一拆五，就係呢一輪升勢正式告終的日子。
本地科網股會點走，陸羽仁成日講，要睇美國行家表現點，代表科技股的納斯達克指數最近表現幾弱吓，唔單止科網股弱，生化股仲嚇死你，不過由於香港唔係咁多生物科技股，故此本地投資者唔係咁覺啫！若果睇番科網股，最近準備喺美國掛牌的內地新浪微博，傳出集資額不足5億美元，被指遠低於預期，對氣氛都構成影響。
去年微博總用戶數量去年雖然有2.81億，但中國網際網絡信息中心發佈數據顯示，數字比去年低了9%，而且使用率呈現下跌。雖然最近該網大爆明星文章緋聞，令點擊率爆紅，被形容為上市前「天上掉下餡餅」，但市場仍對該公司前景半信半疑，妨礙作價，同時削弱了市場對中國科網股的炒作熱情。
市場對微博突然變得咁有批判性，固然有公司本身問題，同時凸顯了炒作氣氛降溫的影響。今年第一季，科網股成為大戶寵兒，好多投行趁機發行長短期的衍生工具，特別係好似騰訊呢類大市值又直線上升的熱股，衍生工具有價有市，大戶造上造得開心，家造落殺落嚟一樣咁high，所以你問我騰訊插到咁殘見底未？我會答你呢類概念股，個價係30倍市盈率抑或40倍市盈率唔係最重要，最重要係個勢係點。好似騰訊直線抽高後，根本貨源已經係大戶手中，大戶用佢嚟炒作衍生工具，肯定多過用佢嚟投資收息，用大戶呢個思維，畀唔畀佢再跌，唔係睇佢股價夠唔夠抵，而係睇仲有無揸咗衍生工具嘅散戶畀佢哋殺！
金沙領跌要留神
騰訊昨日最低見497元，收報501.5元，再挫4.5%，一股已拖低恒指81點，令指數失守牛熊線收市，報22377點，跌132點，叫做安慰啲係國企指數逆市升46點收報10156點。其他科技股跌勢都好慘烈，網遊股博雅(434) 瀉6.6%；金山軟件(3888) 走低6%。
二強另一份子濠賭股都令人擔心，龍頭金沙中國(1928) 的母公司金沙集團加強監察中介人，包括內地豪賭貴賓詳情，確保金沙不再捲入懷疑洗黑錢的指控，金沙挫4.9%，報60.25元。受消息影響，濠賭股遭掟貨；銀河娛樂(027) 瀉5.6%，報67.95元，是表現最曳藍籌，聽澳門朋友講，金沙呢個消息未必係單一個案，濠賭同科網一樣係首季表現標青的板塊，家調整唔算多，短期都仲要小心！
陸羽仁
金融High Tea 舊文