陸羽仁 BLOG 2014年10月10日
舊病復發
2014/10/10 上午 07:47:37
網誌分類: 經濟
美股好似過山車咁大上大落，標普500指數週二跌1.5%，週三升1.8%，昨日重挫超過2%，股市恐懼指數狂升24%至逾8個月高位嘅18.76，真係少啲膽汁都頂唔順。美股昨日由頭跌到尾，彈都唔彈，標普500指數收市跌41點至1928點；納指大插90點至4378點，跌幅都超過2%，前者錄得六個月以來最大單日百分比跌幅；杜指挫335點，收報16659點，跌幅接近2%。美股昨日沽壓嚴重，全日成交大增至82億股，高過過去五日平均近14%。
昨日打擊大市氣氛的原因與呢幾日嘅跌市差唔多。都係全球經濟特別係與美國經濟息息相關的歐洲經濟唔掂碰啱聯儲局官員挑動投資者對加息的敏感神經所致。
首先係驚歐洲經濟危機重臨。德國繼周初公佈工業訂單和工業生產驟降之後，昨日公佈嘅8月出口又較較上月大跌5.8%，係金融海嘯以後最大跌幅。國基全(IMF)總裁拉加德上日警告稱，歐元區經濟陷入衰退的風險已經大幅上升至近40%。昨日強調「盈餘國家(德國)和赤字國家(法國)必須團結起來，令歐元區經濟實現更好的增長。但德國卻堅持需實施財政緊縮措施，反映歐元區內部領導人分歧對貨幣政策的反歧日益加大。更大鑊嘅係歐洲央行行長德拉吉(Mario Draghi)話歐洲經濟唔掂，係結構性問題，沒有健全的銀行及經濟改革，推行量化寬鬆(QE)，沒有效用。呢個講法同當年債務危機爆發的時候，何其相似，事隔多年，又重提呢個解決問題的方法，即係話，多年以來，歐洲的經濟結構根本沒有改善過，令市場憂慮歐債危機的重演。
另外，全球經濟不景氣，導致需求銳減，再加上美國原油產量大增，由最大入口國變成最出口國，造成油價急挫，重挫石油股。Exxon同Chrevon齊挫2.9%，係表現第二及第三差嘅杜指成份股，最差嘅係Caterpillar，大跌3.3%。佢嘅業務出口大型建築機械，國際經濟唔掂加上美元大漲，自然首當其衝啦。油價大跌，頁岩氣股亦變成重災區，其中Penn Virginia及Comstock 昨日勁插超過兩成！,昨日交投最旺，亦係跌得最甘嘅ETF係先鋒歐洲股市基金(Vanguard Europe)、能源ETF、原材料ETF，都係同上述因素有關的。
最後，還是聯儲局幾日加息惹的禍。美國最近一周的首次申請失業金人數減少1千人至28.7萬，低過市場預期的29.4萬，接近2007年金融海嘯前的最低水準。美國聖路易斯聯儲總裁布拉德稱，擔憂市場利率預期與聯儲局的預期脫節。暗示投資者對儲局最終升息時機的預期不切實際。JonesTrading首席市場策略師Michael O’Rourke亦表示，收緊政策係儲局正在採取和應該採取的路線。而量化寬鬆(QE3)將在本月底結束也不利股市，因為支撐股市持續五年牛市的其中一跟支柱將不復存在。他的講話，加重市場的憂慮，無疑係多踩大市一腳。
陸羽仁
回應(3) 我想回應
陸羽仁 BLOG 舊文