異動空間：超人新寵展升浪
港股走勢超弱，但仍有唔少熱炒股，漢能（566）爆上銀河系，皆因市傳有對沖基金沽空被挾爆，要在市場買番十二億股找數，消息傳通街肯定大把人一齊搶，但呢種搶包山式掃貨捱到幾耐？當由銀河系撻落地面，情況會係點？經歷過二○○八年蒙能（276）一役的戰友，你懂的。
早排寫過趙薇入股阿里影業（1060），股價吽咗一輪終於開車，突破千層蟹貨區創收市新高，理論上可跟進。上月底CEO張強受訪時透露，期望將阿里影業打造成製作、發行綜合平台，馬雲亦將與迪士尼、華納、環球影業等片商合作，買入荷李活電影的內地發行權，佢一講，阿里影業發展藍圖終於較為清晰，盈利可能要三幾年後先反映，但有憧憬就有得炒，中期目標先睇高位3.39元。
去年十二月，李嘉誠經長實（001）入股中航工業（232）近一成，成為第二大股東，每股0.6元。股價裂口爆上後已調整兩個多月，回補裂口後料完成震倉，重新踏上升途。最新已放量突破各平均線，MACD重現雙牛，短炒目標0.85元，中期可挑戰一年高位1.11元。
魏力
http://www.facebook.com/2012jason
魏力
異動空間 - 魏力 舊文