文亮言 - 湯文亮 2015年7月11日
【文亮言】昨日買股票的是孤寒注（湯文亮）
港股市跌了幾千點之後出現一個暴力性反彈，就算昨日能夠準確預測恆指會大升，我覺得是勝之不武，唔值得開心。有新進股票投資者在昨日股市收市後打電話給我，話佢前日在股市低位撈底，昨日股市上升800多點，他所買的股票有7至8%升幅，同時，條友又問我點解唔撈
底，如果我唔識就要可以請教佢。有時太謙虛真的是很蝕底，我話唔識股票，條友真的以為我唔識，或者佢唔記得，我曾經被一週刊以新股神的名義放上封面，幾多人恨都恨唔到，但我再次聲明，買港交所的意見是陸東給我，所以，他才是股神，但我又唔知道佢有冇買，佢一定有更多，更佳選擇，港交所只不過是其中一隻而已。
昨日股市反彈，有人話這是技術性，有人講超賣，不過，大家都知道這是暴力性，如果中央唔係暴力壓止所有政府機構，國企賣股票，想反彈都難，前日買股票的人美其名是撈底，其實，他們所買的股票大多數已經持有，而且是貴價貨，以港交所為例，不少人持有300元的貨，前日在200元撈底，其實是溝淡， 犯了投資股票大忌之一，永不溝淡，他們撈底之後又如何，大多數有十多個%利潤就會立刻賣走，又會對人說是今次跌市大贏家，以前D貴價貨，他們早已唔記得。
其實，昨日買股票的是孤寒注，買又唔會買得多，贏少少就走，輸就死揸，贏樂都，輸金勞，有資深前輩同我講，昨日最佳做法就是按兵不動，保持足夠現金，待股票終極一跌時便全力出擊，如果股票掉頭向上，以前D貴價貨就輸少很多，現在股票市場上皇帝複姓現金，揸住佢一定要好好利用，千祈唔好浪費，昨日買股票，浪費至極。
雖然總理話國企唔准賣自己公司股票，但他們可以易子而教，賣咗都冇人知，就算知道都未必違規，所以，賣盤仍然陸續有來，再加上那些孤寒注的獲利回吐，值博率不高，所以，沒有必要昨日買股票，如果夠膽的話，在反彈時賣走一些貴價貨，多持有現金，此為上策，不過，不會有很多人認同，而他們所持理論就是未賣即是未輸，又點會賣。我在賭場長大，有三類人賭錢一定輸，孤寒注是第三類，贏咗縮，輸咗就谷，最終都是贏粒糖，輸間廠。
文亮言 - 湯文亮 舊文