笑到最後：對抗脫歐須靠防守
■網絡年代隨時有新事件主導輿論，不如等公投後再施然入市。 資料圖片
逢有大型國際比賽，市況例靜，今年歐洲國家盃唔算靜，但係淡。咁啱家陣股市參與度偏低，睇波之餘，今屆賽事好多特點可套用喺股市，思考大局應點佈局。「進攻贏比賽，防守贏冠軍」。即係嚇嚇搶分可能贏一
兩場比賽，但笑到最後贏冠軍，就要靠防守。
今屆歐洲國家盃，好多場都開細，一般人話悶，但事實上係各球隊成熟嘅表現，唔會無啦啦去博，寧穩打穩紥，先求唔輸再爭取入球。
股市亦一樣。每日都係比賽，瞓身搶攻，間中會贏一兩次大獲，但唔顧防守隨時一鋪清。畢菲特話，投資最緊要保本金、避免虧蝕，港股汰弱留強，留得喺個市都係強者，一般散仔要打贏呢班強者，次次博盡好快輸清，只可打遊擊偷雞，平時就守住本金。
心水清嘅「球賽投機者」會留意到，今屆歐洲國家盃好多時入球都係最後時刻，以為球賽刺激，原來都計算過。因大家實力差唔多，唔會搶足全場，冇特別優勢就選擇一路拉布，拉到最後15分鐘先博命。
今日港股已唔係長線大牛市，舊年大時代亦過，取而代之係上落市同陰乾。無啦啦中段瞓身衝入去，只會浪費機會成本同利息，仲要擔驚受怕，不如等有勢先衝入去，減低喺留喺市場嘅時間。類似情況今個月已有兩個，先有A股入摩指，身邊有朋友見5月升得咁好就衝，但未等公佈已大調整，結果亦係入摩落空，睇定先入市遠平過之前。
英國脫歐亦係，雖則有議員被殺令脫歐降溫，但入到票箱點投係另一回事，好多人話同當年陳水扁一樣，高明會話：早咗太多，加上網絡年代，唔提真係冇人記得舊文，隨時有新事件主導輿論，根本冇得博，不如等公投之後，再施然入市，好過中間被震盪。如脫歐，個市插落去先趁低吸納。
至於點解脫歐就要買，因脫歐雖然被形容到世界末日咁，但係歐盟出現前，英國都係處於相同狀態，現代社會，只要唔係打仗、天災同核災，最後都冇乜嘢大不了。
高明
http://www.fb.com/bigricetea
本欄逢周一刊出
高明
笑到最後 - 高明 舊文
來源 source: http://hk.apple.nextmedia.com