魚樂無窮：下半年兩招搵食
■去年中央暴力救市後，港股由高位回落一萬點。 資料圖片
有行走江湖廿年嘅戰友表示，從未試過如此難搵食。唐牛股齡冇咁長，但今年前所未有咁難炒是肯定的。第一，回報低。享受過大時代嘅歡樂時光，大家對股價升幅有一定要求，五成是基本，一倍才心足，可惜暴力救市後，港股由
高位回落一萬點，蟹民周街都係，倖存者嘛，全部身手不凡，困獸鬥之下，個個鬥搶雞糊，想食清一色？難矣！
第二，無趨勢。環球經濟前景未明，放水已非萬靈丹，各國央行都束手無策，股市走在經濟之前，走勢更加係冇得估。單睇今年港股，高低波幅約4000點，但大部份時間在1500點範圍上落。結果係點？一升就見頂，一跌就到底，破位追升殺跌輸到仆直，技術分析完全失靈，要贏，只能用相反理論，話明係相反，做到嘅又有幾人呢？
應付第一個情況，只得一個方法︰降低要求！忘記過往倍倍聲嘅升浪，抱住限米限飯嘅心態，贏得少都會開心。應付第二個情況，唯有勤力啲做功課，業績好派息豐，股價自然會上，悶係悶啲，但總好過輸吧。最近睇中嘅有嘉利（1050）同大快活（052），有機會再講！
唐牛
http://www.fb.com/tongcow88
本欄逢周二、四刊出
唐牛
魚樂無窮 - 唐牛 舊文
來源 source: http://hk.apple.nextmedia.com