Money Walker：
脫歐影響有幾切身？
■脫歐推動避險資金流入日圓。 資料圖片
有人話「港豬」𠵱家先知英國脫歐關自己事，因為脫歐推動避險資金流入日圓，搞到啲yen呢幾日最高做過每百日圓兌7.7港元，大家去日本鳩嗚都冇以前咁盡情。
雖然港人普遍唔多關心國際政治
係事實，但筆者認為用到「港豬」二字又過份得滯，作為港人優先關心香港事好正常，明明有時間精神但乜嘢正經事都唔去關心嘅，先至配得上「港豬」稱號。
脫歐對金融市場影響當然好廣。除咗會推升日圓，亦意味住美國低息期會持續更耐時間，加上全球央行或會聯手提供刺激措施，成熟市場國債價格應該高處未算高，大家嘅MPF繼續揀返重倉環球債券基金，一定好過將啲錢泊曬入中港股票基金。
另一樣一般人未必留意到，但屬於脫歐切身影響嘅，係人民幣滙價。人仔同一籃子貨幣掛鈎，單係英鎊同歐元呢兩隻貨幣，已經佔咗人民幣滙率指數四分一比重，脫歐觸發呢兩隻貨幣貶值，人仔當然都會跟跌啦！
不過既然今輪人仔下跌唔係由自身因素所觸發，筆者認為恐慌程度應該不及上兩次人仔急插，但人仔繼續跌落去的話，對港人嚟講都唔係小事。大和話美元兌人民幣未來幾個月最少會落到去7算，計落即係話每百港元兌人民幣會返到大約95蚊，真係時光倒流差不多十年。
英國脫歐係令到yen貴咗，不過另一方面，歐元、英鎊同人仔亦都會平咗，投資市場永遠唔會一面倒，有嘢跌嘅同時總會有嘢升，機會永遠都存在，同旅行一樣，唔去日本玩咪改去英國同歐洲囉。至於人仔平咗，你未必有興趣近近地返大陸玩番轉，但就可能有興趣淘多幾件寶，不過淘寶嘅同時，亦都唔好忘記關心國際新聞。
El.
http://fb.com/moneywalkerhk
本欄逢周三刊出
El.
Money Walker - El. 舊文
來源 source: http://hk.apple.nextmedia.com