飛甩有線要過幾關
2016年07月06日
脫歐後港股反彈，彈到差不多當無事發生過，去到呢啲位，個市開始有啲阻力嘞。喺避險情緒回升下，英鎊在歐洲交易時間早段一度跌至1.3115兌1美元的31年低位，新報1.3139，跌1.1%，兌港元報10.1933，跌1.12
%。日圓就受帶動上升，升穿102兌1美元水平，最新報101.71。
傳于品海斟盤
昨日市場最有興趣嘅消息，其一係傳有線寬頻(1097) 獲南海控股(680) 大股東于品海收購，消息一出，有線股價即有反應，股價向上愈升愈有，終以0.7元收市，升咗近9.4%。 據新一期《東周刊》引述消息，于品海睇中有線電視，連同網媒、報章、電視，並希望打造成傳媒王國，收購估計作價逾100億元。
九倉(004) 有意出售旗下非核心業務，已經唔係新聞，之前集團宣佈有意出售電訊業務，當時傳聞有興趣買家的出價方案未包括有線。九倉無將有線擺埋喺電訊資產放售，最大有兩個可能，一係呢門生意係非賣品；二係估計買家唔會有興趣，擺埋落去反而影響賣盤。以目前電子傳媒僧多粥少，有線過去蝕足八年，相信後者機會應該唔細。不過，如果于品海要收購，佢想一次過買起晒所有業務都唔奇，前提係佢對經營媒體有興趣，而唔係旨在做一盤賺錢生意。阿于如果有足夠水頭，一次過拎大嚿錢出嚟買起電訊同電視生意，咁將來就有電訊生意產生現金流，支撐媒體生意，關鍵只係咁大筆資金喺邊度嚟，因為睇來睇去，南海都無咁多資金，所以報道就估佢係有紅色大水喉射住，買有線係增加相關人士嘅話語權。
有線股價聞收購起舞，涉及各方初步守口如瓶無回應，令人感覺空穴來風，坦白講，有線生意唔易做，在商言商有人買，點解唔飛甩呢檔無乜機會賺錢嘅生意先？不過，斟盤就算有咁嘅事，炒有線賣盤都要留神。首先，雖然聽話今次收購涉及100億元，但包括資產好多，最值錢唔係有線而係電訊業務，咁究竟有線賣幾多錢要分開秤，可以估計未來有線嘅收費電視生意都唔易扭虧，加埋要投資免費電視，未來兩、三年燒番2、30億元絕不出奇，所以計完條數阿于肯畀十零億已經算係咁，屆時就睇九倉收唔收嘞。
再者，就算阿于想買，但由於收費電視同免費電視都有牌照，轉讓要監管，家咁大個九倉去做，政府當然放心啦，但若賣畀第三者，會否再搞個亞視翻版嘅難局，都要小心研究，所以炒佢賣盤，既要睇買賣雙方誠意同實力，仲要睇政府嗰關過唔過到，中間有好多複雜考慮。過去，有線股價都係有短炒、無長升，通常飆一飆又跌一跌，之後低位沉寂一大輪。早排佢攞到免費牌，股價都炒炒，跟住就回番，所以就算炒佢賣盤都唔好一口氣追捧。
大市昨日開始回吐番先前的反彈升幅，恒指低開，及後A股雖然造好，港股未能照跟，午後沽盤增加，最終全日貼近低位收市。恒指收報20750點，急挫308點；國企指數收報8643點，下滑159點，成交金額537億元。
南海局勢明顯吃緊
匯控(005) 、騰訊(700) 及中移動(941) 為跌市元兇，合共拉低恒指89點跌幅。匯控收造47.35元，跌咗1.7%。全球利率前景轉淡，對利息敏感股應有正面作用。大和就睇好中國飛機租賃(1848) 前景，認為因食正中國與亞洲區航空需求增長，該股午後突然炒上，收市跟大市略回，收報8.44元，都抽升咗6.7%。
中國飛機租賃發盈喜，預期截至今年6月底止半年純利按年增長100%，主要受惠於因飛機租賃業務規模持續擴大而增加之租金收入及變現四架飛機融資租賃應收款項之收益。大和就認為，飛機租賃業務食正中國與亞洲區航空需求增長，早前出售飛機拆解業務，有助降低槓桿，相信上半年業績強勁會再度吸引市場對該股的興趣，目標價續睇9.2元不變。另一隻中銀航空租賃就收40.6元，升咗1.4%，佢獲摩根士丹利首發報告唱好，認為往績標青，加上在亞洲區具龍頭地位，首予「增持」評級，可惜佢仲喺潛水區內活動。
在南海仲裁案即將宣佈判決的敏感時刻，中國海事局前日宣佈，解放軍將於今日開始在南海舉行演習一周，範圍涵蓋西沙群島，接近和菲律賓有主權爭議的黃岩島，解放軍北海、東海和南海艦隊均會參加這次演習，受中船防務(317) A股升停板帶動，其H股亦今早抽升，收報12.66元，飆升5%。不過南海緊張，對區內投資氣氛就可能有啲影響。
陸羽仁
金融High Tea 舊文
來源 source: http://hdfin.stheadline.com