獅威撐場
2016年08月05日
港股大跌後企穩，反彈幅度一般，最搶眼係宣佈回購嘅滙控(005) ，全日高收53元，勁升2.7%，仲升穿晒英國脫歐後的阻力，有番小小獅子嘅氣勢。
滙控宣佈回購，呢招真係一美遮三醜，雖然佢九成地區業績都倒退，包括盈利慣左年年增長嘅香港都賺少左錢，但佢
公佈回購計劃，就贏到唔少掌聲，最重要係真係吸引到買盤捧場。
回購仲好過加息
滙控呢次回購，講明股份係唔會註銷，只係庫存擺起，好似投資自己股份咁，咁即係有幾個效果，首先咁樣係唔會減少左股本，對銀行實力無乜影響，但因為發行股數無減少，咁每股盈利當然唔會因此提高啦。最重要係啲股份擺起左，將來若果股價上升係會攞番出嚟賣，咁即係想低買高沽，所以佢唔平唔會買，股價如果持續回升，佢就未必會出手，但單靠出口術已經搞掂晒。
滙控提出回購之餘，同時側側膊取消左漸進式增加派息。有中環茶友話，滙控息率O依家7.5厘其實已經好高啦，再加派息都未必吸引到更多人買，但資金耗用就好大，如果唔加派息用啲錢嚟回購，托住個價，股東鍾意賣股時賣到好價錢，咁可能仲令到小股東願意持股收息，呢啲簡單數學，滙控成班銀行家點會唔識計。
據滙控披露，呢次回購安排係與高盛屬下公司訂立一項不可撤回之非委託協議，讓該公司可替滙控於2016年8月4日至不遲於12月31日期間購買總值不超過25億美元之普通股，並同時向滙控出售有關股份。
對於今次安排，高盛認為這是今次滙控業績最大正面驚喜，反映監管當局對滙控資本狀況感到放心，上調其目標價至58港元(現價53元)。成日同高盛打對台嘅摩根士丹利又唱反調，話滙控放棄10%股本回報率目標後，沒有提及何時達致有關目標，令人失望，評級「減持」，目標價45元。
至於其他大行就偏向正面，花旗指出滙控雖改變漸進派息政策，改為維持穩定派息，但每股每年派息約5.276元仍高於市場預期。該行維持其「買入」評級，目標價53.25元。美銀美林都將滙控投資評級，由「跑輸大市」升至「買入」，主要係預測2017年股息回報達逾7.5厘、兼且受惠回購。
載通觀塘項目傳佳音
喺滙控(005) 力撐下大市造好，佢一隻股已推高恒指57點，結果恒指收報21832點，升93點；國企指數收報9004點，漲26點。除左滙控外，另一隻有英資色彩嘅渣打(2888) 就炒業績好轉，股價仲勁，升左3.8%，造64.05元。
渣打呢場翻身仗，除左話業績改善，應該仲同人事任命有關。渣打派成績表前，覓得主席接班人，委任現年62歲的前西班牙中央銀行副行長Jos Vinals擔任集團主席，接替莊貝思擔任該集團主席。渣打最高層過去被批評對風險意識不足，Jos現時擔任國基會金融顧問兼貨幣和資本市場部主管，職責包括監督及指導國基會之貨幣及金融領域工作，同時是該會於金融事宜(包括全球金融穩定)方面的主要發言人。佢嘅加入相當有助改善渣打面對監管部門的不滿，以及造好風險管理，所以任命消息一公佈，渣打股價已炒左一轉。
收市後載通(062) 公佈，會與新鴻基地產(016) 一齊接納地政總署就觀塘車廠補地價金額。今次補地價為43.05億元，地盤位於觀塘地段九龍觀塘巧明街98號，地盤面積約95830平方呎，最高總樓面面積約115萬平方呎，所有項目成本將由雙方根據發展協議之條款按相等份額承擔。O依家觀塘轉左型，過百萬呎樓面的項目當然好值錢，過去載通嘅地皮，多數係傾完補地價後賣左畀新地，然後用嚟派息。雖然係咁，但佢O依家仍然有曼赫山嘅商場同埋一啲寫字樓收租，成為巴士以往嘅重要副業，O依家佢市值只有88億元，派息有5.6厘，就算O依家未傾掂巴士專利，小股東一啲都唔使驚。近期油價回落，亦對佢有利。
陸羽仁
金融High Tea 舊文
來源 source: http://hdfin.stheadline.com