財路：理士食正印度商機
■電池股中理士預測PE最抵；圖為集團主席董李。 資料圖片
理士（842）打橫行咗成季，喺電池股中，理士預測PE已經係最抵，電池瓣數又有國策炒，理士有得諗。
理士主打鉛酸蓄電池開發及製銷，除咗電訊產品，兼應用到汽車起動、環保車，同太陽能風電等再生能源瓣數。
今年上
半年，理士就虧轉盈1.1億元（人民幣．下同），粗略計數，就算唔計集團上年同期一筆非經常性嘅火災損失7,857萬元，呢個半年都講緊大幅增長80%。當理士今年全年只係keep到呢個半年度盈利水位，都超過上年全年1億元盈利。
仲要咁睇，節能環保國策係重中之中，按中國乘用車燃料消耗量第四階段標準，內地新乘用車到2020年時，平均燃料消耗量，要由每100公里6.9公升，減到5公升。理士「啟停電池」食正呢瓣國策。
之前講過理士家陣兼喺印度合資廠房，而印度係中國以外另一個一次性電池同蓄電池高增長地區。估計到2019年，會以年雙位數增長。諗到係，理士食正印度肥仔商機，照計明年全面反映，成績單仲靚仔！
唔好計多，理士今年全年盈利，係上半年起個孖，到2.2億元，現價0.98港元預測PE，得五倍！理士喺近1蚊水位橫行咗成季，幾條平均線又疊埋一齊，收定等爆邊，當翻半番到1.47元，明年預測7.5倍PE，都仲未追到天能（819）嘅PE水位。
錢雋
細價股專家
本欄逢周二刊出
錢雋
財路 - 錢雋 舊文
來源 source: http://hk.apple.nextmedia.com