股王或轉運
2016年11月15日
美國總統選舉完，美股靚仔，港股就走樣。恒指喺科技股同地產股回落下，指數再跌三百幾點，令人關心熱錢係咪退出新興市場。
資金執位不利科網地產股
喺大選後，金融市場執位情況明顯咗，大氣候喺資金離開債市流入股市，形成債跌股升，對息口敏感的30年期國債，今年以來首度升穿3厘，10
年期國債息亦升至2.21厘水平。同一時間就係科技股跌、金融股升，仲有就係資金似乎由新興市場回流美國，港元呢排弱弱哋，唔知係咪同資金流向有關。昨日科網股王騰訊(700) 急挫3.7%，收報192.6元，地產股都弱，新地(016) 跌逾2%，收報99.75元。無威好耐嘅金融股就相對強勢，昔日銀行股王滙控(005) 初段仲有得升，尾市雖然回軟，但跌幅就明顯細啲，跌0.82%，收報60.65元，保險股都有類似情況，中國人壽(2628) 逆市升0.94%，收報19.4元。
喺特朗普督定入主白宮後激發執位效應。喺呢個浪潮下，曾失去光芒嘅保險股宏利(945) 升上咗一年高位。除咗佢第三季受惠香港同亞洲業務好轉外，不排除同美國經濟國策走向有關。
宏利喺十年前曾經係股民至愛，股價長升長有，可惜金融海嘯後開始走弱，近年中港保險股造好，但佢斯人獨憔悴。宏利由股王變股呆，好多財經分析員都講唔出理由，陸羽仁早前有機會同保險業嘅CEO飲茶，問咗佢呢個問題。正所謂行家一出手、便知有沒有，CEO淡然咁話，宏利股價唔得，佢估一大理由係管理層喺金融海嘯前做咗個好重要嘅決定，大力推動保證回報嘅產品，由於海嘯後美國息口不斷下跌，公司要補貼回報，變成生意做得多補貼愈多。後來公司已改變策略，唔再推呢類產品，但之前所做保單就成為一個包袱，令佢收益大跌。
美息上宏利受惠
聽完行家解畫，即刻明白咗點解股王會走樣。睇番宏利管理層嘅報告，對於業績表現用咗大量技術用語，普通人根本唔明白，不過睇番佢股價喺金融海嘯後就唔得，可見佢受美國影響幾大，呢個亦同佢之前重錘出擊，收購美國嘅壽險公司有關，搞到佢受咗好重嘅內傷，加埋佢嘅收入唔少係加元計價，令到佢喺其他保險股威威下，仍然跑輸大市。
最近一季宏利股價好轉，公司話係亞洲業務好轉，當中香港生意強勁貢獻不少。
如果美國利率正常化，對宏利都應該有利，所以過去一星期佢股價逆市上升。特朗普做咗美國總統，究竟佢嘅諗法有幾多會落實，推行起上嚟會唔會走樣，仲要一段時間至睇得清楚。全球投資市場O依家根據新總統組閣同公佈執政計劃嚟執生，現階段話股王有機會轉運，可能言之尚早，但如果手頭有貨，擺佢喺觀察名單，有貨繼續持有，唔使咁急賣住。
恒指昨日收報22222點，下挫308點；國企指數收報9342點，下滑90點，成交金額807億元。唔同板塊明顯個別發展，金屬股個別爆上，鐵貨(1029) 逆市爆升36%，收報0.255元；金川(2362) 大漲30%，報0.69元；中國有色礦業(1258) 升14%，報1.49元；五礦資源(1208) 升7.6%，報2.28元。美元走強下，金價續軟，金股隨大市下跌，招金(1818) 大插7.9%，收報7.24元。深港通開通日期有望於短期內公佈，部份券商股見支持，西證(812) 就升咗7%。
近日美匯持續強勢，在岸及離岸人民幣匯價進一步下挫，呢個亦對港股有影響。人民幣兌美元即期連破6.83及6.84關口，收報6.8409兌1美元，全日挫254點子，與中間價齊創約七年新低。交易員稱，新的人民幣中間價形成機制下，人行對市場容忍度提高，今日未見大行出手；美匯目前已逼近百點大關，料短期再升阻力較大，如果人仔穩番，咁港股沽壓或者會稍為減輕。
陸羽仁
金融High Tea 舊文
來源 source: http://hdfin.stheadline.com