金手指：美國選舉日點炒股
■留意住美國大選，特朗普贏邊啲州份而實行應對炒賣策略。 資料圖片
上周應承大家，今日孫柏文講禮拜三花旗國選舉結果日，點炒。
禮拜三點炒，有兩樣嘢要睇實。第一，邊個贏。第二，幾時知。花旗國總統選舉，係每個州嘅贏家，攞每州嘅代表票（即好似香港特首選委會係由十八區
代表組成，按人口每個區議會分選委數目，而每贏一區，個候選人就贏曬該區嘅選委）。咁有啲州基本上唔使選，因某黨已經贏硬。
如炒禮拜三即日，就炒東岸結果，如特朗普贏曬賓夕法尼亞（Pennsylvania）、佛羅里達（Florida）、北卡羅來納（North Carolina）、俄亥俄（Ohio），佢就贏。而要估輸贏公佈時間，就要睇贏幾遠。因大比數的話，傳媒唔等點票，純靠票站民調宣佈輸贏。因市唔等人，新聞點宣佈就鬱。以上東岸嘅州，喺香港開市前投完，不過要知結果，就要睇實。
仲有，如特朗普贏唔曬以上四州，唔好落注，雖然佢可執到其他北部州份，不過太唔明朗，一旦打後啲結果唔就，就會被慘夾。如果真係宣佈特朗普贏嗰啲州，咁又點炒呢？股票冇值博率，因香港4點收市，嗰日更絕對唔可以坐過夜，因好難估聯儲局會點，所以寧願唔賭。
不過，如果一但宣佈以上四州啲結果，特朗普每贏一個，相信金同銀就會升一棍。所以要睇實兼鬥快，一出四州中之一結果贏，就買金、銀。如果贏曬，金、銀就會學脫歐嗰次咁升，如果任何一個州輸，就係時候平倉轉現金離場。禮拜三會好考大家敏捷度，祝大家好運，天祐世界。
孫柏文
獨立股評人
http://www.fb.com/shuen
本欄逢周二刊出
孫柏文
金手指 - 孫柏文 舊文
來源 source: http://hk.apple.nextmedia.com