去產能效果漸現
2016年11月11日
特朗普當選呢隻黑天鵝，被人當成肥燒鵝係咁「噍」，被人嚇親沽貨嘅股民，就有機會低位黯然被迫離場。雖然個市好快穩定番啲，但係亦唔代表前面係一片坦途，可以當乜事都無。
美國大選爆出當地傳媒口中的所謂的大冷，但股市反應異常神奇，杜指期貨喺點票時在外圍跌到停板，但到美國開市竟
然唔止當無事，反而仲升左上去。有人話，特朗普做左總統，竟然即刻變番正常人，宣佈勝利嘅演講大方得體，表現相當好，令到驚佢搞亂檔嘅人無咁擔心。
跟住大家睇吓，佢原來背後都有班猛人撐場，包括曾經被認為有力參選總統的前紐約市市長朱利阿尼，同前共和黨議長甘里奇，傳聞前財長保爾森都係特朗普幕後智囊，呢班都係好有份量同網絡嘅資深政客，有佢地做盲公竹，大大減低左特朗普闖禍嘅風險。
另一個減少左外界憂慮嘅係之前特朗普聲稱自己好反對量寬，揚言做左總統就會炒左聯儲局主席耶倫，但佢當選後就即刻轉調，唔再提呢樣嘢。特朗普係咪唔會換耶倫，現在言之尚早，但至少佢睇嚟會先搵到適合人選先至郁手，而且無論如何要等到2018年2月耶倫約滿才可動手，目前唔使太擔心。特朗普的連串動作都令人覺得，呢位吹水王係出口術呃like，做左皇帝就會轉軚。
市場驚魂甫定後出現反彈，不過，呢個反應有多少係鐘擺效應，由一個極端走向另一個極端，因為講到底特朗普以政治素人身份，由政治體制外一下子進入核心，佢會有乜動作，不可預測性仍然好大，所以現階段唔可以好似唱衰佢嘅媒體所講，肯定佢好有破壞性，但亦不宜當無事發生，因為喺投資市場，不穩定同不可預測都係一種風險，相信市場在未來一段時間，仍然會處於相對敏感的狀態，當有風吹草動，個市就會相應出現波動。
正如陸羽仁所講，特朗普靠吹吹出一片天，佢坐正之後，市場人士開始翻吓佢嘅競選承諾，睇吓有幾多會走數。有「債券大王」之稱的亞格羅斯表示，特朗普當選令人感到意外，共和黨亦成功控制美國國會，但不會令經濟加快增長。
債王話，即使特朗普將大量政府支出投向基建領域，但由於人口、債務去槓桿和技術驅逐就業等結構性因素抑制增長，佢維持對美國1%至2%的經濟增長預測。
銅鐵金屬股狂飆有因
投資市場開始冷靜下來，所以港股昨日一開已經無平貨執，恒指高開433點，隨後升勢一度擴大至503點，收報22839點，上升423點或1.89%；國企指數收報9545點，上揚167點或1.78%，成交金額718.84億元。藍籌股普遍向好，當中金融股表現突出，滙控(005) 升3.5%，報60元；中銀香港(2388) 升4%，報27.6元；另騰訊(700) 升2.9%，報208.2元。
不過，市場炒得最開心仲係去產能概念。市場藉口話憧憬特朗普會增加基建推升銅鋼等金屬需求，國際銅價續升，加上內地商品炒作熱持續，炒起A股的有色金屬板塊亦起，本港一眾金屬股隨之起舞，新疆新鑫礦業(3833) 爆升25%，報1.14元；俄鋁(486) 走高16%，報3.2元；嘉能可(805) 大漲12%，報26.4元；江銅(358) 升13.66%，報11.48元；五礦資源(01208) 升11.73%，報2元；鞍鋼(347) 升9.9%；中鋁(2600) 升10%，報3.36元，真係睇到眼到花。
睇番除左金屬股，煤炭炒風未止，煤炭股再展升勢，中國神華(1088) 升2%，報17.16元；中煤能源(1898) 都升3.4%，報4.32元。呢啲股份都係因為習大大呢幾年開始大力去產能，改善左經營環境利好股價，由於中國係產煤大國，效果最顯著，所以煤股先升。跟住輪到鋼鐵股，呢個概念比特朗普搞基建應該實在好多，不過佢地升得咁急，要跟都要等等先啦。
陸羽仁
金融High Tea 舊文
來源 source: http://hdfin.stheadline.com