異動空間：
危機時掃貨易輸
■下年如出現黑天鵝，再用今年嗰套投資方法隨時輸大鑊。 互聯網
今年最後兩篇稿，趁市悶無米落鑊，不如簡單做個前瞻分析。今年聽得最多的財經名詞應該係「黑天鵝」，由年初熔斷、油價暴瀉、德銀危機，到6月英國脫歐、11月特朗普當選，關關難過關關過，說好的大冧市無出
現，美股更因加息萬劍歸宗而破頂。
經過一年的艱苦訓練，越來越多投資者相信，逢親有黑天鵝飛出，就係飛撲入市掃貨的良機。不過，相反理論告訴我們，在投資市場，當絕大部份人都相信一件事，件事多數會行去相反方向。
彭博剛進行2017年華爾街大行調查，全部大行睇升，最睇好睇2500左右，最「悲觀」都睇2300，兩者差距為彭博2007年有統計以來最小。「狂人」忽然變成最可信的人，連對沖基金Bridgewater舵手Ray Dalio都轉軚，話「侵侵」有利營商，令美國人重新發揮動物精神，適者生存，力爭上遊，睇到魏力眼都凸埋！2017全街睇好美股，即係戒心不能少。
另一個預測係，下年如出現黑天鵝，再用今年嗰套隨時輸大鑊，皆因明年暫未見十分明顯的大鑊嘢，投資者準備不足，唔似今年個個成手cash等撈貨，明年爆危機時衝入場更易接火棒，小心。
魏力
http://www.fb.com/2012jason
本欄逢周一、五刊出
魏力
異動空間 - 魏力 舊文
來源 source: http://hk.apple.nextmedia.com