無細藝 炒餐股
2016年12月07日
生意淡薄不如賭博，近日個別半新股炒作就令人側目，有隻叫膳源(1632) 的餐飲股，上星期二以兩元上市，呢兩日炒起，昨日收市報14.54元，單日升幅43%，一個星期唔夠喪升6.3倍！
膳源掛牌暴漲6倍
有中環茶友事前收到風去捧場，佢
諗住食少多覺瞓，結果錯過咗順風車。茶友唔係幾笑得出，話呢隻股招股時，有熟人就叫佢支持吓。茶友問乜料？係咪「啤殼」先？熟人就拍心口話，呢間公司個名好多人唔識，但佢旗下嘅餐廳「越棧」就多啲人識，老闆喺2003年沙士時期創業，靠賣法式越菜起家，捱咗多年上到市，應該唔係諗住「啤殼」啩，不過，今次幫佢上市嘅投行信達都有啲來頭，買吓應該唔怕。
股價喪升 帳面財富
聽完之後，茶友心諗香港餐飲業出名難做，如果唔係啤殼，咁做乜上市呢？跟住佢就無乜點理無入股，但跟住佢招股大幅超額115倍，上市首日收3.51元，已經升咗76%，以為佢炒完，點知收一收貨，到呢兩日仲炒到開巷，累積暴漲6.3倍。
後來熟人同茶友講，呢排班炒家無乜好搞，於是就圍晒飛係咁落鑊。佢笑言，越棧走大眾化路線，老闆捱咗十幾年上到市，新股上市執正嚟講係半年唔賣得，可能佢都無諗過忽然會咁富貴，雖然係帳面財富，但幾日翻幾番，唔知佢有無覺得炒餸不如炒股呢？
茶友話，股市乃係玩金錢遊戲之地，同做胝手胼足嘅實業唔同，好多白手興家的創業老闆成功將公司上市後，見到身家日日大漲，就搞到無晒心機做好本業，但佢哋唔知道股票要賣得到、套咗現，先至算係有真銀落袋，中間牽涉的竅妙同難度唔少，所以身家暴漲可能只係魔鬼的考驗！入場炒的散戶也一樣，買入要賣出，賺咗落袋，仲要唔好畀隻股再引番入場，先至叫賺真錢，一啲都唔易。
膳源咁炒法，反映個市都幾苦悶，大嘢炒唔郁，炒家要搵啲「細藝」過日辰。茶友咁講，可能有小小係錯過咗順風車「葡萄」，不過從旁觀小股民角度，公司截至3月底全年賺2390.5萬，現價市盈率粗粗哋係122倍，市值爆升到29.1億元，以佢O依家營運緊20間餐廳計，每間餐廳身價超過1億元！大家如果跟住去炒，應該知道自己買緊乜！呢啲好似我哋細個玩的傳氣球遊戲，唔好音樂停的時候揸住個波。
買大股好過博大霧
其實，要賺錢亦唔一定要火中取栗，好似呢排金融股輪流發力，落注佢哋都已經輕鬆過關。滙控(005) 周一於倫交所回購404萬股股份，周二喺香港大升3.4%，報63.4元，創咗一年新高，即係過去一年買佢都賺錢。滙控股價喺過去十年基本上都令人失望，好多唔係咁買股票嘅人有閒錢都買佢，結果做咗大閘蟹。不過，自從佢話回購股價後，陸羽仁就拍爛手掌，話做生意不如益股東，賣咗啲有價值但回報唔好嘅業務，用啲錢嚟投資自己股份，唔係仲聰明啲咩！再加埋美國喺長期低息環境下，有機會將利率正常化，咁即係滙控息差有可能改善，所以佢嘅股價喺脫歐後反而變為強勢。
買大股同炒細股嘅唔同嘅係，投資大股可以睡得安心，所以可以買多啲，所以升幅雖然無咁大，但總額仲和味，好過玩啲乾炒牛河股蚊型股。通常藍籌股轉勢係唔會咁快玩完嘅，過去佢不斷探底，你唔信邪係要買，結果就買到你驚，O依家佢掉頭上番嚟，有貨者照計就唔使咁快落車，反而係逢低吸納至啱。
喺大笨象、國壽(2328) 呢啲金融股帶動，加埋濠賭股造好下，恒指高開188點，最多升241點，恒指收報22675點，升169點；國企指數收報9768點，漲57點；成交金額607億元。
陸羽仁
金融High Tea 舊文
來源 source: http://hdfin.stheadline.com