魚樂無窮：
殼股馬房生力軍
■殼股馬
房最近多咗個新練馬師，就係陸東。 資料圖片
炒開殼股嘅戰友，都會有本秘笈。甚麼秘笈？派系秘笈是也！強國企業南下搶殼，往往兩三隻甚至更多，通常同系一隻炒起，資金便跟勢追逐姊妹公司，情況好似跑馬咁，告東尼贏咗頭兩場，馬迷之後便會追住佢馬房嚟買。
殼股馬房最近多咗個新練馬師，冇錯，講緊嘅就係噚日B1頭條主人翁陸東，睇睇佢最新披露嘅殼股持倉，噚日七隻有五隻升，平均升幅達一成，旗下組合靠殼股去年勁贏46%，羨煞旁人。你話基金炒殼股唔合情理，我就話搵到錢就係贏家，君不見好多人玩藍籌輸到喊嗎？
講殼股講到咁開心，今日當然要搵隻好殼股推介一嚇。路訊通（888）早前宣佈，委任資深傳媒人燦哥羅燦做董事總經理。消息公佈後，股價升極都有，噚日仲破旗而上。
燦哥魅力固然利害，但更引人入勝嘅係，路訊通阿媽載通（062）同期宣佈，委任高豐做雷禮權嘅替任董事。高豐何許人也？投行及私募基金出身，做過大摩同KKR，再睇番路訊通，7億元市值中有一半係cash，無論變身定賣盤都大把空間，兩大高手同時坐鎮，淨係炒憧憬都唔止呢個價啦！
唐牛
http://www.fb.com/tongcow88
本欄逢周二、四刊出
唐牛
魚樂無窮 - 唐牛 舊文
來源 source: http://hk.apple.nextmedia.com