智取大市：霧霾概念有排玩
■霧霾概念股未來個幾月，都有短線吸納嘅機會。 資料圖片
特朗普突然嫌美金過強，美金即跌、人民幣即反彈，油價、金價同時升，即時反應正路不過。不過，特朗普講嘢嘅影響力只會越嚟越細，因為講得多，效力都會滑啞，一句講曬，毋須太認真。
近排炒得起嘅股，由早前鋼鐵股，直
至周二蔓延至再生能源、水務股、電力設備股，講到尾都係霧霾概念。今年地方兩會聚焦霧霾治理問題，成為呢啲板塊嘅周二上升動力，相信會延續至3月兩會之前，甚至有機會變成港股單一炒作concept，因為中資股基本因素差，大戶唔買佢哋，實在好難諗到買乜，反而有助霧霾概念熱鬧氣氛保持，未來個幾月，每次回吐都會變成短線吸納機會。
霧霾概念涉及受惠股唔少，正面影響較為直接嘅，就有電力設備股，因為要減少汙染，做多啲風電、水電、光伏發電，都唔知講咗幾多年。北京市發改委主任盧彥講到「最大限度地壓減電力行業的本地排放」，喺經濟放緩之下，無理由叫工廠減少生產，更實際係更換低排放、更具效能嘅新電力設備。東方電氣（1072）股價早已突破大圓底頸線6.9元水平，成交增加兼走勢轉強，有機會借霧霾概念由弱勢股變強勢股。
晉佳
http://www.fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.apple.nextmedia.com