跟炒「股改概念」
2017年01月18日
美國總統特朗普即將就任，有中環茶友笑言，政治都係憧憬美麗，現實殘酷，O依家公主去到舞會嘅終結，華貴雲裳會變番粗衣麻布，仲要發覺佢係男人，投資市場會唔會覺得掃興真係要等着瞧。
特朗普未上任，已經惹起左好多反對聲音，呢個境況令茶友諗起五年前嘅
香港，當時好多人期望改變，好支持行政經驗唔係咁多的梁振英上台。特朗普以敢於打破常規贏到選民支持，但佢嘅主張未上台已受到既有勢力嘅狙擊，當中包括佢嘅保護主義政策。特朗普嘅經濟主張，最大亮點係要企業將工廠搬返本土，佢係探訪車廠時施壓要人地將生產線移返國內，總統開到聲大公司實畀吓面，真正做幾多則是後話啦。
伯南克踢爆總統的新衣
前聯邦儲備局主席伯南克呢兩日就踢爆新總統，話美國經已接近全民就業，根本唔使出乜招數去搞好勞動市場。伯老講法好有為聯儲局同僚出頭嘅味道，亦係為維護自己放水救經濟嘅成績。佢呢番話好似細佬仔踢爆皇帝光脫脫無着新衣，其實係無料到得把口。
美國O依家失業率跌到去5%，有朋友係美國返嚟，都話有兩類工種請唔到人，一類係藍領勞動階層，呢啲工全部要靠有色移民去填補，特朗普話要收緊移民，呢啲工搵邊個做？另一種係做高科技人才，O依家美國科企對人才需求好大，薪高糧準，所以特朗普大大聲話要搞就業改善待遇，根本無實際需要，佢咁講只係方便將前朝嘅成績偷過來，偷左人地嘅芝士自己食，有份幫共和黨收拾爛攤子嘅伯南克，自然要出聲踢爆啦。
伯南克仲話特朗普當選後美國債息升過龍，好似想為市場淋冷水，送特朗普上路。茶友話，好似美國呢啲咁成熟嘅政治體系，個人唔可能係短時間內做到好多嘢，所以佢會關注特朗普新政嘅長期影響，但短線美國經濟相信仍係按現有的復甦軌跡運行，新政嘅短期期刺激可能已經反映得七七八八。小心第一季末段美股開始逆行。
對於特朗普新政，摩根資產管理環球市場策略師陸庭偉認為，要落實佢主張的經濟政策，料需多月時間進行前期工作，包括經國會通過，預計財政措施最早到8月先得，基建方面的成效更要到2018至2019年才見到。最實際反而係如果企業稅率由目前35%降至20%左右，能幫助企業增長，帶動當地經濟。陸庭偉又覺得，特朗普上任後不會發生貿易戰，認為現時所有亞洲國家都不符合貨幣操縱國的條件，美國與亞洲等主要國家的貿易短期不會有大影響。
中船防務唔似炒業績咁簡單
全球股市等緊美國新總統上台，A股昨日先跌後升，人仔繼續企穩，恒指跌一日回升，收報22840點，升122點；國企指數收報9702點，漲36點，成交金額501億元。
呢排內地個市炒緊混改，特別係一啲有國防概念嘅股份。中船防務(317) 呢排挑戰一年新高，皆因早前中船重工集團董事長胡問鳴公開評論「南北船」合併方案。佢話，中船將通過新股上市、「買殼」等方式，加快集團旗下股份的資產證券化速度。他表示，希望國資委能通過殼資源劃轉的方式，盤活國企資產證券化水平，充份發揮資本平台的作用。對於「南北船」合併這件事，一切聽從中央的安排，現在更重要的是把集團做大做強，為後面的發展做好準備。
分析認為胡問鳴公開回應「南北船」合併，提高合併預期。中船防務去年一度勁蝕，重組後今年9月底止首三季業績由虧轉盈，純利660.44萬元人民幣，不過，佢股價昨日勁升11%，收14.14元，應該係跟炒內地股改概念多過業績。
陸羽仁
金融High Tea 舊文
來源 source: http://hdfin.stheadline.com