收市閒情 - 千頌C 2017年1月18日
收市閒情：林鄭「故宮式」玩fb
■林鄭唔玩fb，又唔想失去網上嘅影響力，真係矛盾。 資料圖片
一個人處事手法係點，由佢點玩facebook（fb）多多少少都有跡可尋。幾日貼一次新手袋相，加句：「今天要獎勵自己」，港女格表露無遺；「他不是男朋友，但比男朋友更親更重要」，仲唔係專業觀音？
That"s why老闆們請人前會先scan嚇求職者fb；而又that"s why大家都認為玩fb玩到出神入化嘅財爺，夠貼地兼民望高！林鄭月娥日前嘅參選宣言，強調公眾參與、強調社會共識、強調適切回應……好似好堅咁，咁不如睇佢點玩fb。
Oh，Sorry！林鄭是沒有官方fb的，不過佢唔係冇玩㗎！林鄭個「網絡戰戰術」，四個字：隔山打牛！你去劉鳴煒fb，見到佢星期六po咗幾張奶媽去「親善探訪」嘅相（留意番，盛傳Package Lau將出任林鄭競選辦副主任）；競選辦主任陳智思星期日又幫奶媽po行山相。咁樣「隔山打牛」嘅政客應該係香港獨有！消息人士就話，林鄭公關團隊策略係，自己唔開fb，但就發相畀朋友po，然後私下通知友好媒體發放消息，話咁樣易控制輿論。噚日我打過去競選辦，問佢哋幾時開fb，佢哋都係話：「總之暫時就未有啦。」林鄭處理社交網絡嘅手法，最簡單講，其實佢咁玩fb，即係等如「假溝通、假諮詢」。
之前拍板起香港故宮，然後事後再開放公眾諮詢，擺出一副「起我就起硬，最多呢幾part仔留畀你班友話事啦」嘅態度，然後大大聲聲話「我做咗諮詢啦」。
今日搵自己友po親民相，網民連直接畀like畀嬲呀奶媽都冇機會，難道咁就當同網民溝通過？今日因怕「嬲」，怕見到唔想見到嘅留言，就索性唔開fb；他日當選後，遇到任何好可能惹來批評嘅政策，係咪因怕咗反對聲音，就索性「故宮式」做法，唔諮詢就拍板？
想當年梁振英要選特首，都扮曬嘢聽民意。今日林太強調公眾參與、強調社會共識、強調適切回應……講咁多嘢，不如開番個fb，融入網上500萬港人用戶嘅世界先啦。
千頌C
http://www.fb.com/winbigwok
本欄逢周三刊出
千頌C
收市閒情 - 千頌C 舊文
來源 source: http://hk.apple.nextmedia.com