地產股小陽春缺底氣
2017年01月13日
呢個星期港股炒反彈，地產股都郁郁吓，不過彈咗一日，昨日都係個別發展，有盤開嘅新地(016) 有得升，收報106.4元，升0.7元，但個別已有啲乏力。中環茶友話，地產股有得郁，一來係炒落後，仲有就係偷步炒小陽春，不過呢個小陽春，用內地講法，
「底氣」有幾壯就難講嘞。
上年底政府出招加辣，印花稅一律加到15%，諗住㩒低樓價，結果雖然辣度好勁，效果卻無想像中咁得，最明顯係二手交投的確係縮晒，樓價都好似係慢咗，但新盤就無畀佢嚇窒。有鍾意鬧政府嘅茶友就大罵，辣招其實係幫咗發展商，佢哋有定價權，「嘜」高個價之後畀番辣招稅當優惠，成功咁搶晒二手樓市嘅購買力，所以政府呢招根本係幫新盤搶客。
本地薑搵食難咗
有茶友對呢個講法就唔係幾同意，佢話收到料發展商其實都計緊數，因為過去幾年政府增加土地供應嘅效果已經慢慢出嚟，今年落成嘅新樓會增加好多，估計累積未賣嘅單位會逼近十萬大關。過去發展商遇着辣招，多數會縮盤等市場累積購買力，今次見到個市氣氛好似唔係咁差，就決定唔等照推盤，皆因今年咁多新樓落成，如果唔把握時間去貨，萬一美國好快再加息，咁等到幾時先推盤呢？所以O依家呢個小陽春只係局限喺新盤，二手樓唔旺，而且仲有啲趕住嚟。
發展商有樓堪賣直須賣，仲整個「本地薑」鬥「過江龍」嘅戲碼。由新地推出嘅元朗盤，同內房商中海外(688) 推嘅啟德盤硬撼。由於兩者價錢唔係相差咁遠，萬四元一方呎左右，市區啟德盤收票就壓倒元朗盤，有人就話覺得中海外係「賤價搶客」。
茶友就話，中海推啟德盤，每方呎賣成萬四元係咪平確係見仁見智，佢定價平過元朗盤，一來係佢嘅名氣無新地咁大，新地賣樓一向走高價路線，大家路線不同；再者呢個啟德盤係港人港地，買賣有限制，兩個盤唔可以直接類比。「本地薑」定價高，可能係唔想平賣，須知O依家地搶到咁貴，賣咗未必買得番，所以好難跟人哋賤賣搶客，總之，從買家角度，發展商賣得愈平就愈好。
茶友話，「過江龍」同「本地薑」相比，過江龍承受風險嘅胃口確實係大啲，好似港人港地有賣樓限制，本地發展商就唔願意出好價競投，塊地就畀中海外投得。同樣，早前政府為咗增加土地，拎咗啲畀人司法覆核嘅地出來競投，本地發展商一樣唔想去馬，結果呢啲地幾乎全部畀內房商擸晒。
香港嘅土地儲備主要在幾間龍頭大地產公司手上，尤其係有能力慢慢搞補地價、重建嘅大公司，佢哋坐擁優勢，風險低、回報高，係好好做嘅生意，所以買地產股亦係股市最易賺錢嘅方法之一，基本上只要你肯長揸，都會有唔錯嘅回報。但經過去幾年內房商全力掃地，佢哋已成功搶灘，形成一股新勢力，令地產生意競爭大咗，本地發展商生意難做咗，再無以前咁易賺錢。過去地產股炒小陽春，升幅有時可以去到甚至超過兩成，都幾和味，今年呢次就未必可以咁樂觀啦。
九台農商有爆冷味
雖然美股杜指再升近兩萬點，港股喺連升四日後下跌，恒指收報22829點，跌咗106點；國企指數收報9723點，下滑10點，成交金額633億元。騰訊(700) 呢排升得太急，昨日回調1%，報收198.8元。多隻新股首掛，九台農商(6122) 收市升6.8%，收報4.87元，升幅雖然比唔上大熱嘅億仕登(1656) 嘅10%，但勝在夠冷，上市時散戶夠膽申請，基本上要幾多有幾多，所以你夠膽買就有水執了。
陸羽仁
金融High Tea 舊文
來源 source: http://hdfin.stheadline.com