醒目大股東要識做
2017年01月26日
港股仲有兩日收爐，唔知大家係咪睇好會紅盤高開，呢兩日股市升啲升啲，話唔定咁就破埋兩萬三千點。大市升唔夠一百點，但就有啲焦點大股。一隻係電視廣播(511) 、一隻係中華巴士(026) ，兩隻都係上左市好多年嘅本地股份，本身有相當家底，臨近收
爐就炒佢分家當、益股東。
電視廣播喺日前宣佈回購計劃，作價比市價有溢價，而且出手相當豪，一擲就用40幾億買番自己嘅股份，咁即係為股份完成回購前包左底，所以一開市佢就彈高近回購價。
電視廣播中巴有動作
電視生意難做，但大台係現金生意，收益不低，與其派8厘幾高息嚟支撐股價，不如嚟一招回購，咁等有意離場股東開心吓，回購股份註銷後，股數減少，公司又可以推高每股盈利，增加資金內部回報率，好過俾股東眼超超。
呢種做法陸羽仁最贊成，好似早前滙控回購，我就話呢吓係高招，大大改善左滙控管理層畀市場嘅印象。電視廣播副主席黎瑞剛看來係有為嘅人，唔甘於坐住老本，寧願一擲巨資回購變相增持，顯示其大開大合嘅作風。
另一隻彈高嘅股份中華巴士。事源本地基金Argyle Street Management(ASM)向中巴發信，要求中巴動用現金儲備回購及增派股息。ASM話，顏氏「大家姐」顏潔齡拒絕與其會面，但已接觸「大少」顏傑強等股東，將爭取聯同其他股東召開股東大會，提出每股派息20至30元。據ASM嘅講法，現持有中巴3%股份，大部份是去年12月底從安寧(128) 手上以每股88.8元收購得來。
持股不足一個月，ASM即出手向中巴發信列出5大要求，其中稱中巴估計持有26億元現金，認為中巴作為地產商，無必要持有太多現金，因此要求中巴增派股息，甚至回購。
ASM一基金經理表示，向中巴主席顏潔齡發信後一直未能接觸中巴董事局，但ASM已與中巴副監理、持股15.3%的顏傑強會面，亦有與持股12.26%的陳君實、持股近15%的支盈章家族及其他持股基金治談，反應正面，「大家都等緊人做嘢」，所以股價即時飆升。
石油石化股果然翻炒
中巴資產豐厚係人都知，佢作風唔可以話好差，耐唔耐都有派吓特別息，因為佢呢種作風，所以坐住嘅資產得以慢慢升值，O依家基金買左貨就想速食，從小股東角度當然唔反對，因為有錢派吓絕對無壞。
根據過去經驗，要狙擊中巴唔係咁易，但中巴大股東顏氏家族有番咁上下年紀，都有機會多一事不如小一事喎。好似電視廣播同中巴嘅例子，反映本地不少公司大把水有條件派利是，最緊要識揀。過去大股東習慣有錢死攬住，但O依家世道唔同左，人人識維權，大股東最好識做，有錢大家使，咁就大家開心。
周二美股靚仔有得升，恒指高開後重上23000關，惟臨近農曆新年假期，獲利盤限制大市升幅，午後升幅曾收窄至僅升12點，收市前發力再上，重上23000關，收報23049點，升99點；國企指數收報9742點，跌16點%，成交金額537億元。
藍籌股普遍上揚，擬於英國關閉分行及裁員的滙控(005) 重上65元，升1.47%，報收65.5元。之前唞氣嘅石油及天然氣股果然再造好，中國煤層氣(8270) 升9%，報0.164元；中石化冠德(934) 漲8%，報3.8元；大股中石油(857) 升1.1%，報6.25元。
市傳內地將加快削減鋁產能，中鋁(2600) 升4.4%，報4.08元。其他有色金屬股亦獲資金追捧，俄鋁(486) 升9%，報4.3元；哈薩克礦業(847) 升6.25%，報42.5元。
陸羽仁
金融High Tea 舊文
來源 source: http://hdfin.stheadline.com