金融High Tea 2017年1月6日
阿爺收水 大夾人仔淡倉
2017年01月06日
新年交投淡靜，但最平靜嘅地方，亦係最危險嘅地方，個市成交少，本來係買賣兩閒，大鱷渾水摸魚之時機，不過阿爺經過去年年頭人仔大插的教訓，今年年頭大力反攻，收緊人仔供應，搞到人仔利息急升，匯價急彈，搞到空軍急急補倉，連帶港股亦都急升332點以上。
人仔隔夜息升至38.34厘
港股昨日反彈，主要係人仔帶動，而人仔最犀利嘅一浪，在昨日中午時份的離岸市場，人仔突然大幅走強，一口氣升穿多個關口，直逼6.8算。截至下午1時27分，離岸價報6.8122兌1美元，較1月4日低位6.9693，大幅反彈超過1574點子，反彈幅度達2.26%。據中銀香港(2888) 電匯價顯示，每百港元最新可換87.52元人民幣。人仔匯價抽高供應緊缺，拆息同步急彈，據財資市場公會資料顯示，隔夜人幣同業拆息大幅抽升至38.34厘，較昨日飆升21.39厘，創近一年新高。
整理番阿爺呢次出招嘅思緒，相信喺假前已經醞釀。喺放聖誕假前，匯市已經有不少聲音唱淡人仔匯價，理由除咗係美元強勢外，仲話新年頭內地人換匯額度重新計算，估計有新一批換兌潮，最離奇係外電喺過節期間突然報咗個人仔兌美元破7價出嚟，搞到人心惶惶，人行第一時間出來否認兼譴責，但消息對市場信心已造成衝擊，呢劑嘢相信都令阿爺高度警惕。
所以一踏入2017年，阿爺已經連環出招，既用行政程序控制換匯，又出到叫停兌匯投險支票，最辣係傳出幾個後着，包括要求國企結匯。本來，年尾國企都要交數，若然阿爺出招要國企拎埋啲外匯出嚟，咁對成個匯市嘅人仔都抽緊，離岸人仔供應亦奇缺。
大力收緊離岸人仔供應，主要針對沽空咗人仔到期要交收的淡倉，佢哋到期要交番人仔出嚟，例如去年年初沽空咗一年期人民幣，今年初就要結算，如果大鱷在年頭隊低人仔匯價，咁佢哋就食到盡，平倉後等人仔反彈又開新淡倉。但如今人仔一夾升，若大量遠期淡倉差不多同時到期，個個搶住要搵人仔結算，人仔匯價自然高上加高。
人仔蟹貨到價可走
做咗人仔淡倉的大鱷，亦都要管理風險，隔夜息高到38.34厘，即係1日都要畀0.105厘息，10日就唔見1.05%，加上匯價急上有雙風險，沽空者可能被迫平倉減低風險。若然人仔淡倉不是去年一早開，而是年底才開，匯價一上淡倉夾到平倉，就馬上要輸錢。
阿爺就想話畀大家聽，佢唔會任由唱淡大戶予取予攜，炒人仔下跌，一夾倉亦可以輸死人，令將來跟風去沽的人減少。呢一招夾息，本來如「食毒藥杜老虎」，隨時人哋唔死自己死先，因為利息成本急升，借咗錢嘅企業都要跳樓。香港在1997年為咗捍衛港元匯價，也曾將隔夜息夾到300厘，結果股市樓市重創。
不過阿爺只是在隔岸市場夾息，內地市場唔受影響，夾息唔影響經濟，阿爺更可以放量夾到你傻。等人仔再夾高啲，若手持人仔蟹貨的散戶，到價唔使輸可以走人，因為阿爺夾高畀你走，唔走就笨，好花不常開也。
風高浪急炒嘢要防險
人仔受壓時，港股人升佢唔升，人仔急夾，港股即係跟夾，大市最多升349點，高見22483點。恒指收報22456點，急漲322點，國企指數收報9598點，上揚157點，成交646億元。藍籌股普遍造好，有色金屬股都再現鑊氣，五礦資源(1208) 爆升14%，報2.21元；中信大錳(1091) 升7.07%，報0.53元。
睇番匯市同股市表現，大戶有匯市、股市兩邊落注嘅味道，除咗造淡人仔外，都順手造淡埋股市，所以先至會夾起人仔，個市都升埋。O依家個勢係大隻佬打交嘅局面，一面係北京，另一面係外資大鱷。大鱷想喺人仔下跌嘅浪潮搵大水；中央要挺匯價亦唔想益炒家。阿爺除咗銀彈，仲有行政干預權力；大鱷水多之外，有美元強勢嘅天時地利，對戰雙方都實力雄厚，角力起嚟波幅可以好大，好似昨日個市一夾可以飆三百幾點，若然同人仔匯價相關嘅股票飆得仲多，但要記住有機也有危，呢啲市況或股份波幅咁大，買中固然好，買錯邊可以輸得好甘，自問風險胃納唔係咁大者最好係避開吓啲人仔匯價敏感嘅股份，如果要買就要預咗佢會好CHOK呀。
陸羽仁
金融High Tea 舊文
來源 source: http://hdfin.stheadline.com