財經評論：
港樓水魚何其多
■Grand Yoho2期至今認購反應，不如1期熱烈。 資料圖片
新一年，地產商鼓勵大家要繼續發奮圖強，努力搵錢供樓，否則他們的新盤又怎能越賣越貴，港樓如何繼續興旺、樓價長升長有呢？
2017年首個新盤開價嚇人一跳，收票反應更嚇到大家仆落地。新地（016）元朗Gran
d Yoho1期於去年8月開售，當時樓市氣氛未見火熱，賣樓一向有計的新地，拿少量單位以「廣告價」發售，首批平均呎價1.2萬元有找，平過二手。結果短短八天勁收近1.7萬票，被喻為難抽過居屋，奪得1997年後新盤「票王」寶座。
賣完頭一批後，新地見購買力強勁，即使邊賣邊加價，仍有大量「水魚」湧埋嚟，賣到尾呎價已加至1.46萬元。港人總貪少便宜，麥記日前賣10蚊9件麥樂雞，我星期二晚收工打算幫襯，點知去到已經賣曬。賣樓亦一樣，只要開價夠平，一樣排長龍。緊接推出的2期，廣告價不再，收票聲勢大不如前。
聽地產代理講，Grand Yoho2期在開價後首日只勉強收過百票（約130票），有人解釋因只是平日，好多人都要返工，未能反應實況，相信到星期六日便見真章。之但係，1期於去年8月18日首日收票，也是平日，仍能勁收逾1,800票；與之比較，2期收票量勁跌九成。有代理話，「呢口價係有阻力，唔同上次（1期）啲客衝入來話好平」。
近年地產商不斷測試樓市極限，當原來賣2萬蚊呎仍大把水魚，下次就賣夠3萬蚊。當加到市場承接不到，自然要減價。市場總有極限，當元朗兩房單位賣到1,000萬，如果咁都仲有水魚，只能再一次證明，香港樓市海產生物何其多，樓價點跌。
記者：朱連峰
財經評論 舊文
來源 source: http://hk.apple.nextmedia.com