跨國礦業股得激
2017年02月15日
美股再度大升，但港股早前升得多有啲氣弱，拉牛上樹，微跌收市，不過大市氣氛唔差，個別股份繼續有炒作，而大市成交繼續在860億的高位。
個市好，企業活動增多，市場開始出現抽水行動。日前電盈(008) 減持香港電訊信託(6823) ，套現近80
億元，香港電訊股價跌左一日後，昨日升番1.6%，配股成為短期低吸機會。昨日輪到俄鋁(486) 主要股東減持，據外電引述配股文件顯示，俄鋁嘅股東Onexim配售左5.05億股，相等於約3.3%股權，每股作價3.7元，較昨日收市價折讓9.5%，套現近18.7億元。受主要股東減持影響，俄鋁一開市低見3.78元，跌7.6%，然後反彈，收報3.95元，挫3.4%，收市價已比配售價高。
俄鋁配售大撼大
俄鋁係該國大型鋁生產商，有一條龍優勢。由於生產鋁要耗用大量能源，俄國有豐富嘅能源，令俄鋁甚具競爭力，當年港交所花左唔少唇舌游說佢嚟香港上市，希望平衡港股倚賴內地國企同民企嘅局面。俄鋁來港可惜生不逢時，遇著內地經濟開始降溫，西方又爆發金融海嘯，所以股價長期潛水。直至去年開始，股價先由去年6月低位2.08元回升，今年2月2日去到5.15元的高位，累積升幅超過一倍，由於股價升幅咁大，以配售價3.7元計都有13倍市盈率，觸動左主要股東減持。
睇番俄鋁截至去年6月底止6個月中期業績，公司賺左 2.61億美元，同比跌幅 70.3%，主要係期內營業額下跌 18% ，同時毛利率下跌。佢係業績倒退下股價反升，主要係佢出口全球市場，如果美國真係大興土木，加上搞高鐵項目，對鋁需求會顯著增加，簡單講係炒前景。O依家主要股東減持，令佢股價借勢調整，但有人賣亦有人買，接貨大戶顯然係睇好。
過去半年，金屬股係跑贏大市嘅板塊，呢類公司分兩類型，一類以內地為主要市場，一類做國際市場。內地市場主要受惠內地政策，2016年內地大刀闊斧的供給側改革去產能，熱卷、螺紋鋼主力期貨的價格較去年年初大漲了80%左右，鐵礦石主力期貨漲幅更是達到了110%。
分析師估計2016年整個鋼鐵行業盈利復甦，成為推動呢類公司股份向上嘅動力。至於俄鋁呢類公司就要睇國際價格，西方經濟復甦先係佢地嘅動力，即如另一隻大型天然資源生產商哈薩克銅業(847) ，過去一年股價由12元爆升到昨日57.3元的高位，足足升左四倍，反映左礦業股經過早經年爆破後的強勁反彈，所以追買呢類股價係膽博膽，買得大賠得大，相當之刺激。
越房業績交到功課
個股因為配售波動外，港股昨日整體拉鋸，恒指收報23703點，跌7點；國企指數收報10254點，跌3點，成交金額855億元。蘋果公司股價周一於美市創新高，帶動部份本港上市的手機設備股於周二造好，瑞聲(2018) 升1.2%，報86.2元；富智康(2038) 升0.34%，報2.93元；舜宇光學(2382) 再漲3.6%，報50.9元。此外，電視廣播(511) 提高回購價，周二大升9.23%，報33.15元。
同升跌急驟嘅礦業股比，房託股猶如老爺車，但勝在有高息夠穩陣。越秀房產信託基金(405) 收市後公佈去年底止全年業績，可分派總額8.247億元人民幣，按年升17.1%；基本每個基金單位盈利0.25元人民幣；每基金單位末期分派0.1506元人民幣。幾間大行之前唱好越房納入深港通後可以吸引新資金吸納，深港通慢熱，暫時見唔到有井噴式效應，不過基本業績交到功課，股價昨日逆市升0.9%，收報4.47元。
陸羽仁
金融High Tea 舊文
來源 source: http://hdfin.stheadline.com