高位慢進
2017年03月22日
美國議息後港股持續反彈，昨日繼續向高位進發，而家市況主要受北水帶動，中字股輪動炒上。
中字股呢排分批炒上，最先炒升嘅內房股，上周尾段抖氣，昨日反彈。大陸地產市場經過幾年調控，去年中央鬆一鬆手，推動去庫存，樓市即刻升溫。今年開局樓市熱度繼續維持，內
房商公佈嘅銷售數字唔錯，為了防止樓泡擴大，好多個地方都加番調控措施。
陸羽仁同內房商高層飲茶，傾起點睇調控措施，佢話內地嘅消費者經過多年「訓練」，已經習慣左調控，有調控市況就正常啲，無調控就仲加癲。
恒生H股慢活式破位
內房高層嘅講法當然有佢自己嘅利益立場，不過睇番政府呢排推出調控，內地網民嘅反應大概都係覺得調控措施只係阻度未上車嘅人買樓，已經有樓有資金嘅人，仍然繼續有辦法買樓炒樓。
而家炒賣焦點唔不過係由大城市轉去二線城市，再由二線城市轉向三、四線城市。又或者由一線城市市中心轉去近郊外圍。在兩會期間，市場擔心會有打壓樓市嘅措施，結果當時未有出手，後來各地出限購等調控措施，用力已經唔算猛，所以消息出左後內房係高位回落，呢兩日開始又企番反彈。
碧桂園(2007) 昨日大升5.8%去到6.73元。恒大(3333) 升3%去到6.54元。萬科(2202) 升2.5%去到22.9元。中海外(688) 升1.2%到24.8元。
我認為內房要關注嘅唔應該只係集中調控措施，另一點反而係佢地嘅股價已經升左唔少，任何股票都有個價，當佢升得多就會反映佢嘅價值，投資風險就會增加。內房、汽車呢啲板塊去年生意好勁，股價因此爆升，係咁大嘅基數上要再上就唔係咁易，加上累積升幅大，所以升得急就會回調，抖完之後可能會再升吓，但要記住係佢地股價已經唔係咁平，輪炒嘅力度可以持續幾耐，真係要睇入市嘅資金。
中資股近排輪炒，中環茶友話，若然唔想花心機追逐，可以睇吓隻恒生H股(2828) ，佢基本上反映中資股走勢，只要大股上升佢就得益，當唔同板塊輪動，佢就有得郁，雖然係慢啲，但就唔會走雞。呢輪中資股強勁，佢已經突破左早前嘅高位，如果唔識揀股又想買吓中資概念，可以等佢稍回時吸納，當然呢啲位入市就要定止蝕。
國企指數再升一日，收報10644，上揚60點；恒指收報24593，升91點或0.37%，成交金額952億元。
另外隻狂升股美圖(1357) 昨日再殺人，開市頭半個鐘先升7.1%，升到17.12元，若你以為無事追入就中招啦，之後一直插，以近低位14.6元收市，再跌8.6%，若高位追入單日都唔見左14.7%！ 市傳監管機構睇緊美圖近排交易，隻股進入唔易炒的階段。
高銀趁私有先散水
早前好勇投地嘅高銀地產(283) 突然宣佈，大股東蘇通提出將公司私有化，建議須待就實施建議所需資金與銀行簽立融資文件後方可最終釐定。高銀地產復牌後股價曾飆22%，高見8元；收報6.88元，只升5%。市場咁嘅反應，估計係因為佢而家股價同淨值比有溢價，咁即係話唔知私有化出價幾多，再者，佢係要搵到融資先提出，仲有就係佢曾經瘋炒上26元，就算大股東話私有化，中間都有好多關要過，咁諗真啲都係高位食胡實際啲啦。
陸羽仁
金融High Tea 舊文
來源 source: http://hdfin.stheadline.com