魚樂無窮：
滙控破位有啟示
■滙控有好業績傍身，兼有近6厘息，具一定吸引力。 資料圖片
踏入五窮月，恒指走勢反覆，暫未能擺脫魔咒，但大笨象滙控（005）卻直撲今年初高位。眾多藍籌中，撇除宣佈私有化嘅百麗國際（1880），升幅最勁嘅就係滙控，問你服未。
滙控能夠脫穎而出，多得成績表靚仔，
在淨息差擴闊及撥備大減下，首季盈利遠勝預期。「管理層話唔好旨意每季回購喎，咁咪冇人托價？」需知道，當初滙控回購，係業績唔掂的副產品，旨在托住股價，既然業績交到數，股價理應自動波砌上。一個病人好番都唔會亂食藥啦，戰友們切勿本末倒置。
你可能會疑惑，滙控業績係咪真係咁勁？我唔係分析員，所以答你唔到。但客觀事實係，一隻有流通量的股份，有一份良好業績傍身，有近6厘息墊底，有不減派息的保證，仲要係重磅藍籌，相對來說，其實有一定吸引力及競爭力。膽敢講句，買嘅一定唔單止係北水，環球大小基金也肯定在狂掃貨。
講咗咁耐，究竟啟示係乜？唔係想講大笨象可以帶領大市衝關，亦唔係叫大家有買趁手，而係港股值得投資嘅選擇越來越少，唔係點會輪到滙控發圍，一句到尾，太多公司唔爭氣了。
唐牛
http://www.fb.com/tongcow88
本欄逢周二、四刊出
唐牛
魚樂無窮 - 唐牛 舊文
來源 source: http://hk.apple.nextmedia.com