央行縮表猶如縮水
2017年05月09日
港股上周插咗兩日後，昨日出現反彈，但中資股繼續受內地收緊銀根影響。睇番首季內地中資股炒咗一輪經濟見底，但隨著內地收緊銀根，A股開始有啲唔夠血腳軟軟，可見資金流向影響陸續浮現。
歐洲政治氣氛隨著法國大選結束轉趨平和，由於選民支持歐洲一體，令極
右派候選人勒龐翻艇，區內局勢穩定番啲，港股借勢反彈。雖然係咁，內地A股繼續受緊，加上最近習大大話要做好金融監管，所以中資股未能跟隨大市上升。滬指進一步下挫並擊穿年線支撐，黑色星期一再度上演。上證指數收報3078點，跌24點，深證成指收報9833點，跌191點。
A股缺水率先腳軟
內地股市弱弱吓，陸羽仁同位政經猛人傾起，佢問有無留意點解A股咁弱呢？皆因大陸係上半年開始去槓桿收緊銀根，仲早過美國縮減央行嘅資產負債表。但佢話亦唔好睇低美國聯儲局縮表呢樣嘢，因為如果加息，銀行體系有錢，只係利息成本高咗，都仲有得炒，但抽走資金後，就搵唔到水炒作，打擊仲直接，所以如果美國遲啲真係縮表，股民都要小心。
同樣，金融界近日都開始關注央行縮減資產負債表嘅影響。中銀香港發表《財經述評》，話人民銀行資產負債表收縮，同埋美國聯儲局官員多次提及縮表進程，都引發市場高度關注。撰寫相關觀點嘅分析員劉雅瑩話，今年以來人行資產負債表的收縮主要是人行對其他存款性公司債權下降了1.06萬億元人民幣。人行縮表與美聯儲縮表有著本質區別，由季節性因素解釋更為合理。
她認為，在監管升級下，內地金融機構開始陸續收縮同業業務，比人行縮表更有廣泛影響。值得注意的是，在監管重拳下，近期不少金融機構已經開始收縮其同業業務，未來首先看到的或是金融機構的縮表。為了達到MPA考核標準和滿足監管要求，金融機構或將進入全面縮表的時代。一行三會的監管升級，也會驅使非銀金融機構調整其資產負債表。
相比之下，她指出人行資產負債表6年多以來只增長30%，美國則在金融危機後增長4.5倍，所以美國縮表要更小心。聯儲局可能是首先針對國債採取「部份停止再投資」的策略，經過一段時間後視乎宏觀經濟和金融市場環境而有限制地「主動拋售」MBS，以減少縮表對金融市場的衝擊。
港鐵強勢創歷史新高
有人唔明乜叫縮表，簡單啲講其實即係央行收水。美國量寬放水放得咁緊要，縮表收水係遲早嘅事，無論係中國抑或美國，當儲局抽緊市場資金供應，對全球資產價格都會有影響，衝擊有幾大就要睇資金流轉嘅速度係咪會隨經濟好轉加快，足以緩和水量減少嘅影響嘞。
雖然日A股無乜力，但金融板塊昨日表現就唔錯，頂住港股表現。滙控(005) 連升4個交易日，於周一曾高見67.25元，收市報66.8元，升0.45%；渣打(2888) 、宏利(945) 、保誠(2378) 都升。
上周因內地收緊信貸而受壓的中資金融股於周一普遍反彈，建行(939) 升0.8%，報6.21元；工行(1398) 走高1%，報5.01元；國壽(2628) 漲0.66%，報23.05元。其他大股最勁係隻港鐵(066) ，佢創咗上市新高及收市新高，盤中高見45.9元，收市報45.6元，升幅1%，係近排嘅典型強勢股。
陸羽仁
金融High Tea 舊文
來源 source: http://hdfin.stheadline.com