經濟客艙：
錯過總好過買錯
■股神畢菲特去年初密密吸納蘋果公司，至今賬面賺184億。 資料圖片
回到17年前、千禧科網泡沫，畢菲特不相信科技公司，相比其他傳統實業公司可口可樂或美銀及富國銀行，無咩經濟規模或業務出現強勁「護城河」。科網爆破前，有說股神走寶；科網爆破後
，也有說股神洞察先機，避開股災。對股神而言，買科技股，錯過咗，可以等機會買過，總好過買錯。
科技發展並無因為當年股市泡沫爆破停滯不前，由iPhone到A.I.，股神17年後都要講句世界變。股神當年科網泡沫無損手，但承認錯過投資Google同亞馬遜的黃金機會，呢兩間公司現時已經雄霸全球最大市值公司首五位。
股神去年初巴郡卻密密吸納蘋果公司，成為十大持倉，至今賬面賺184億。副主席芒格在今年股東會上都話「望唔透」呢位戰友點解大手買入蘋果公司，講笑指畢菲特「一係癲咗，一係佢學緊野，相信佢後者。」畢菲特坦言買咗蘋果公司股票，對科技冇長知識，但令佢更理解消費行為，努力學習中。
股神押注蘋果公司，其實當佢係一隻充滿科技元素的消費股。一位唔用iPhone同高科技產品的投資者，搵到蘋果公司投資機會由食雪糕而起。今日食雪糕，個個小朋友都iPhone不離手，產品同顧客之間擁強大連繫，更重要蘋果公司建立一個極強產業生態圈，一個平台係由一間公司獨食賺錢，可以引進其他公司齊搵錢。股神，唔係宜家先睇到呀嘛？蘋果公司對股神另一種吸引力，公司豪爽派息政策，對長線投資者而言好重要。坐擁2568億美金的蘋果公司，今年加碼派息132億美金。蘋果公司派息比率為1.7%，略為跑輸標普500指數平均股息率2%。仲有股神唔用iPhone都知今年適逢10年周，有助刺激iPhone銷售同收入，再加埋特朗普減稅，蘋果公司派息比率增長空間，股神同樣憧憬。
Captain Cool
https://www.facebook.com/seeforcaptain/
本欄逢周一刊出
Captain Cool
經濟客艙 - Captain Cool 舊文
來源 source: http://hk.apple.nextmedia.com