財金冒險號：如何打救香港傳媒？
■香港記者出名人工低，只有離地富豪至以為「起碼都4、5萬蚊人工」。 資料圖片
壹傳媒（282）連蝕兩年錢，宣佈逐步外判編採工作，再引起「傳媒寒冬」、「紙媒沒落」的討論。傳媒難做，原因眾多。即時新聞不求深入、只求快趣，錯字常見，充斥標題黨，於是讀者得
出「記者質素低」嘅印象，越嚟越唔願意畀幾蚊買份報紙。最慘係記者質素無可否認正退步，而且難望見底回升。
香港記者出名人工低，只有離地富豪至以為「起碼都4、5萬蚊人工」。上年記者協會調查，超過三成受訪新聞工作者月薪介乎1萬至1.5萬元，36%打算於兩年內離開傳媒行業，唔止轉工，係轉行！主要原因係人工低。
視傳媒工作為踏腳石，浸兩三年，累積一點人脈，轉做公關，或者跑幾年財經新聞，轉撈金融，大有人在。畢竟生活逼人，尤其喺樓價離地嘅今日，為理想同興趣，甘願領取同工作量不成正比嘅薪水留在傳媒，實在唔容易。幾錢至留得住人才？唔使4、5萬。英國記者平均月薪約2.8萬港元，美國約2.6萬港元，年資五年以下嘅，都有2.1萬港元，低過好多藍領，但已好過香港好多。
優秀記者為搵食轉行，留低堅持理想嘅小眾，同平庸嘅一群，報道質素自然江河日下，讀者日益離棄。香港老闆一味縮皮，只會造成無間惡性循環。要改變行業生態，除非騰訊（700）、阿里巴巴之類巨頭肯燒錢，搞間高薪傳媒，但機會微乎其微，因為從商業角度，比起14億人市場，700萬人微不足道，如果當作政治河蟹任務，內容質素又不忍卒睹。
笑笑生
http://fb.com/sneeringman
97年主權移交至今，香港前進還是倒退？「蘋果」與你細數廿載風雨。
【回歸二十年】專頁：http://hksar20.appledaily.com.hk
笑笑生
財金冒險號 - 笑笑生 舊文
來源 source: http://hk.apple.nextmedia.com