殭屍股搞壞氣氛
2017年06月28日
港股昨日指數變化唔大，焦點落喺多隻細價股暴跌之上，似乎觸發今次小股災嘅係傳言港交所會逼啲成交少嘅殭屍股退市。港交所之後澄清無其事，但呢類股仔依然死傷枕藉。
港股上午開市牛皮，但途中已見細價股爆發股災，跌幅榜二十大上榜股，跌幅至少三成，最重傷
O個三隻，跌幅更達九成以上。從事資產顧問服務及資產評估、企業服務及諮詢的漢華專業服務嘅創業板股仔(8193) 洗倉式暴瀉，觸發其他細價股大跌，主板上市嘅中國集成(1027) 一度挫94%，報0.017元；美捷滙控股(1389) 挫88%，報0.125元；中國置業投資(736) 挫81%，報0.019元；財訊傳媒(205) 挫79%，報0.02元；品質國際(243) 挫85%，報0.1元，一時間風聲鶴唳。
港交所驚變仙股風波
股仔咁跌法，有傳聞說是港交所(388) 前天提交提案，為激活香港小企業創新，要強制將低於1元，且平時交投不活躍的殭屍股退市。見到咁遍地屍駭，港交所嚴正澄清，以上傳聞完全沒有事實根據。
股仔爆災成因滿天飛，另一個版本係曾經做過港交所董事嘅David Webb早前發表「50隻不能買的港股」名單曝光後，令相關莊家線融資出問題，最後被迫斬倉；仲有就係證監會將某莊家的證券牌照吊銷。
見到啲股仔咁跌法，港交所急急澄清，相信係吸取左十幾年前嘅仙股風波教訓，當年證監會想加強管制仙股，整份文件出嚟，結果觸發呢啲股份暴挫，演變成政治事件，搞到當時證監同財金官員一鑊泡，港交所都有人要狽鑊，所以一見有風吹草動，港交所第一時間就跳出嚟劃清界線，之後個別災股跌幅隨之稍為收窄。
最後跌幅榜頭十三位跌幅仍達五成至九成四不等，其中中國集成(1027) 大插94%，報0.016元；漢華專業(8193) 急挫93%，收報0.064元；「翠如BB股」聯旺集團(8217) 下挫89%，報收1.06元；美捷匯(1389) 下滑81%，報0.192元；匯隆控股(8021) 下跌80%，收0.032元。
睇番呢啲暴跌股，好多都係股價脫離現實，好似隻中國集成喺2015年上市，即刻由做雨傘變成做乾炒牛河，股價不斷乾炒爆升，變成喺高位上得唔落得，昨日佢暴跌94%後，市值仍然超過12億，市盈率超過170倍。「翠如BB股」聯旺跌左89%後，亦仍有42倍市盈率。
以前呢啲股份大幅炒高後會又拆又送，搞到股民眼花繚亂，大戶趁機沽貨。近年盲俠小股民都輸清，內地股民炒股的興趣又唔係呢啲股仔身上，所以莊家都好難做，而家佢地暴挫，或者吸引到啲股民走去撈吓貨博反彈，呢啲係純粹投機行為，落場者要知道自己做緊乜，但如果從盈利或派息角度，好多都仲係價錢好貴。
習大大訪港前要醒定
細價股災雖然唔係乜嘢大件事，但對氣氛都有啲影響，指數午後曾低見25780，最多跌91點，尾市跌幅先逐步收窄，恒指收報25839，跌31點；國企指數收報10498，下滑32點，成交金額725億元。藍籌股周二普遍向下，多隻中資金融股偏軟，單計建行(939) 、工行(1398) 、國壽(2628) 合計已拖低恒指31點，建行跌0.8%，報6.12元；工行跌0.6%，報5.22元；國壽跌1.2%，報24.1元。不過，騰訊、中銀香港(2388) 及吉利齊齊創新高，其中騰訊曾高見288.4元，收報288元，升1.4%；中銀香港高見38元，收報37.4元，升1.5%；吉利曾見16.46元，收報16.16元，升4%，為現最佳藍籌股。此外，瑞聲(2018) 一度升至101.5元，收報99.1元，升1.6%。睇嚟喺習大大訪港前，港股牛皮之餘，都要打醒精神去維穩。
陸羽仁
金融High Tea 舊文
來源 source: http://hdfin.stheadline.com