撈底殺人陷阱
2017年06月29日
港股昨日下跌百幾點，但話題仲係離唔開殭屍股股災，呢批係周二大跌嘅細價股早上急彈，但彈完再插，呢吓回馬槍認真攞命，若然心多手腳慢，咁就好大機會中招。
翠如BB股一撈即瓜
成堆細價股前日急挫，好多人撈底，以為有得博，結果出現十五樓跌落嚟跌唔死
，第二嘢彈上三樓再跌落去就死得人多的狀況。以翠如BB股聯旺(8217) 為例，老實講早前升到26元咁高散戶都唔敢掂啦，周二大插，跌到1、2元散戶就覺得可以炒啦。
唔好睇翠如BB股昨日只跌16%，睇真啲佢上日收市1.06元，昨日一開市就抽上2.01元，如果見佢彈得咁勁以為無事就追入，咁就奶晒嘢，唔使15分鐘，佢就插返落嚟，得番7毫幾子，連同前日收市前入貨嘅股民全部大濺血。如果係開市「咁叻」以市價2.01元入左貨，跌到收市0.89元，計落已經唔見左56%，真係都幾得人驚，已經係第二個股災。其他受災嘅細價股都跌得多，而且成交都唔少。
翠如BB股再插唔係特例，好多細價股再遭洗倉，發盈警的雋泰(630) 收挫49%，報0.085元；中國投融資(1226) 急插46%，收報0.067元；中國錢包(802) 下滑42%，報0.114元；皓文(8019) 跌56%，報0.052元；吉輝(8027) 跌44%，報0.092元；匯隆(8021) 跌40%，報0.019元。呢啲受災嘅細價股好多跌幅仲勁，而且成交都唔少，估計好多即日鮮散戶已經損手。
聯旺當日上市無乜賣點，大家只識公司老闆係藝人黃翠如嘅老爸，佢上市狂升，大家未必敢沾手，所以高價僵持硬晒軚，成交稀疏，變左殭屍股。呢啲殭屍股過往炒法係瘋狂夾高，跟住又拆又送，搞到眼花後跌落嚟，博股民手痕炒反彈，浪比浪低派貨出街。呢次發生殭屍股股災，股民走嚟撈貨，唔理大戶係無錢財困被人斬倉，抑或戲院失火死左唔知乜事，總之呢啲股份基本上股價跌左九成仲係離晒地，炒佢地同買輪盤差唔多。
陸羽仁經常講，買股要分「投資的我」同「投機的我」，「投資的我」要揀有資產、有息派嘅股長揸，跌左落嚟都唔驚佢執笠的公司去買。「投機的我」就可以順勢短炒，但就算係投機都要計吓風險回報率，走短線都要預吓萬一買錯有無逃生之門，同埋股價最差去到點，好似呢啲殭屍股好多都係流通量低，無資產兼無派息，基本上就係一支超級大火棒，接唔佢唔小心隨時燒到卜卜脆，所以去撈底同去殺人陷阱探險差唔多啦。仲有就係「投機的我」最好定10至20%止蝕，但好似聯旺咁15分鐘跌70%，跌得太快太急，定左止蝕都執行唔到，就係炒呢類高危股的風險。
係股仔爆大鑊下，市場氣氛只係麻麻，恒指收報25683，跌左156點；國企指數收報10408，下滑89點，成交770億元。藍籌中嘅強勢股係吉利汽車(175) ，收市升2.1%，報16.5元；滙控(005) 升0.44%，收報68.5元。旺旺(151) 升2.34%報5.24元，成表現最佳藍籌。
太古要搵外來醫生斷症
最後講吓藍籌動向，太古(019) 公佈，委任岑明彥為公司常務董事，今年8月7日起生效，細睇佢嘅履歷，佢本來係外面嘅顧問公司任職，空降入去董事局。睇嚟太古老闆可能都係覺察到外界有意見，認為公司營運出左問題，特別係好似國泰(293) 咁，需要搵外人嚟睇睇，執吓發展方向，所以會有此一舉。睇番太古系公司，近年表現麻麻，最叻係食正地產大浪嘅太地(1972) ，其餘好多業務都係和和果果，以一家百年老店嚟講，自然唔可以唔做啲嘢，要係外面搵個公司醫生斷吓症。
陸羽仁
金融High Tea 舊文
來源 source: http://hdfin.stheadline.com