時來「風」送地產股
2017年09月11日
八九月份係風季，颶風不僅吹到香港、澳門，在美國接連兩個強風，都令政府大受考驗，連金融市場都受打風經濟學影響。
繼四級颶風哈維狂襲德州之後，佛羅里達州又將迎來更強勁的五級颶風艾爾瑪，除咗人命傷亡，對財物損失都好大。為了應付風災，國會火速
通過救災同債務上限，流風所及，美國10年期國債收益率下滑至2厘邊緣，收報2.04厘，較9月1日高位2.162厘，大跌5.7%！美息愈跌愈低，睇勢頭，大有機會失守2厘水平，主要靠利差食胡的銀行股，就跟住下挫。
救災乘機提高債限
特朗普做咗總統後，頭頭碰着黑，兩個大風打到嚟，自己畀通俄門搞到一身蟻，跟住仲有北韓金正恩走嚟捋佢虎鬚，所以美元年初見頂，下半年走勢更弱，美息展望係第四季都開始無咁堅挺，弱美元同利率回落，對金融股有影響，但對股市整體有利。港元跟美元掛鈎，都受弱美元影響，美息早前有再調嘅趨向，令港匯一度跌到聯匯下限，情況持續有可能觸發加息，但上個星期港元再度轉強，升穿7.80兌1美元，曾見7.7936水平，為3個以來高位，港息跟加的機會隨之下降。
要留意係人民幣呢排持續上升，上周五即期突破6.44關，曾高見6.4345，全日收報6.4617兌1美元，升355點子，收盤價創近22個月高位，人仔升得咁急，同基金沽咗淡倉要平有關，係平倉活動完成後，相信匯價會轉趨和緩。人仔低位回升不少，加埋收取較高利率，死揸人民幣的存戶守得雲開見月明，呢個對大市氣氛都有好處，對地產股亦比較有利。
跟風揀股要睇埋土儲
美息偏軟，本地地產股變成時來「風」送，加上憧憬港府將推的首置上車計劃將利好本港樓市，好多地產股上周五都爆升。恒地、新世界發展(017) 、新地及長實地產(1113) 等本地地產股成升市主力，恒地升5.8%報52.85元，為表現最佳藍籌；新世界發展升5.65%報11.22元；新地升4%報133.7元；長實地產升3.6%報68.35元，四股合共為恒指貢獻62點。
幾隻龍頭地產股猛升之餘，信和置業(083) 同佢阿媽尖沙咀置業(247) 有啲唔同。因為信置同其他大發展商比蝕底嘅地方係手頭土儲唔多，特別係農地數量有限，佢上星期五大力炒上，主要係兩母子以約105億元出售都市綜合項目「信和-御龍山」。在成交完成後，合計將分別為尖沙咀置業約33.61億港元及為信和置業約64.54億港元。而家信和負債唔多，再有大筆資金回籠，相信派息點都會有所表示。不過，呢啲一次過刺激，力度當然無手頭有大把土儲嘅公司咁有靭力啦。
眾安下周開始路演
地產股上周末領漲，唔多唔少有炒落後嘅味道，雖然大市周五上升，恒指收報27668，國企指數收報11149，但以全周計，恒指累積下跌284點；國指累積下滑135點。美股周五個別發展，杜指收市報21797點，升13點，納斯達克指數收市報6360點，跌37點，標普500指數收市報2461點，跌3點。
恒指係兩萬八千點嘅阻力唔細，如果指數未能突破，唔排除會繼續係落後板塊尋寶。有報道由「三馬」阿里巴巴主席馬雲、騰訊(700) 主席馬化騰及中國平安(2318) 董事長馬明哲坐鎮的眾安保險，已通過上市聆訊，將於下周一進行路演。據悉，將於18日舉行正式推介會的眾安保險，集資規模達10億至15億美元(約78至117億港元)，可望成為今年繼國泰君安證券(2611) 之後，集資額最大的IPO。中環茶友話，呢隻以科技做包裝嘅保險股好大機會吸引大小戶捧場，雖然佢同平保無直接關係，但如果想炒眾安保險新股，不妨考慮短炒一轉平保。
英皇接班人孖超蓮 頻度計倡青年義工
呢排地產股樓齊旺，市區盤尤其搶手，英皇同市建局合作嘅喜遇，一開市就接近賣個滿堂紅。呢個樓盤英皇老闆楊受成同接班人楊政龍都親自出來壓陣。呢個市區盤貼市價推，公司形容係「小確幸價」，以及為市區盤中的「理想價錢」，項目話咁快去貨，淨計住宅都收番近7億元。
楊公子呢排除咗賣樓外，仲忙於陪住好友何超蓮。上個星期有中環茶友係酒會見到何超蓮，自然要八吓呢單料，超蓮就話兩個人成日係埋一齊，都係諗吓點樣做善事啫。佢話自己係富二代，都好想回饋社會，所以同一班志同道合的朋友成立慈善組織Smile with Us HK，呢個組織除咗幫人之外，仲希望可以針對年輕人，動員佢哋出嚟做有意義嘅社會服務，咁點都好過成日坐係電腦前面打機吖，所以佢就成日同好友楊政龍一齊，都係為咗度橋。
緋聞變焦惹嬌嗔
早排，兩人就透過社媒，見咗一班年輕義工，希望可以組成一個服務嘅班底。不過，對於加入者佢哋都要審查吓，確定佢哋係真心誠意想幫人。除了組織義工，超蓮同茶友，早排自己做義工，幫一個住係劏房嘅單親媽咪搬去好啲嘅地方，仲落手落腳幫佢裝修整地板。佢又輕發嬌嗔，自己好多時出席公開場合，都係想宣揚義工訊息，但外界成日都聚焦啲似是而非嘅緋聞，令佢都有啲無奈。
陸羽仁
陸羽仁周記 - 陸羽仁 舊文
來源 source: http://hdfin.stheadline.com