收市閒情：「朋友」過橋抽板
■「香港摩天輪」新舊營運商傾唔掂數，投資推廣署嗱嗱聲同Swiss AEX割蓆。 資料圖片
「追追趕趕，高高低低，深呼吸然後與你執手相隨，甜蜜中不再畏高，可這樣跟你蕩來蕩去，無畏無懼」無畏無懼？Are u serious？
中環海濱「香港摩天輪」，新舊營運商
傾唔掂數。呢壇嘢畀香港人最大嘅啟示係：識朋友，最忌識著「投資推廣署」類。
想當年2014年，大家聽話中環開摩天輪，連香港人都潑冷水，當時瑞士營運商Swiss AEX都係預期，一年都係100萬人坐。點知3年過去，夾埋有500萬人去玩，當年Swiss AEX CEO仲力讚投資推廣署幫到手，推廣署當然有將「香港摩天輪」Case貼堂放上官網認威威。
不過，朋友，推廣署真係當你一秒朋友。𠵱家一出事，真面目現形，官網成個摩天輪Case deleted。咁即係咩意思呢？「我喺FB unfriend咗你啦，我哋冇Friend過㗎。」話曬過去3年，Swiss AEX有功又有勞。推廣署咁樣一刪Post，係話畀人聽，「外國公司Welcome to HK，但你有事，我閃先，You eat youself la。」
如果大家有印象，投資推廣署過橋抽板式對待外國公司，唔係第一次。想當年推廣署都有幫Uber引入香港，結果一入香港，就落閘放狗，投資推廣署又漏夜鏟文。講近啲，Gobee.bike又係推廣署幫手引入香港，結果又係入到香港先俾人話犯法。
當你去健身中心買Package，Sales講到呢樣得嗰樣冇問題；點之買咗Package發現呢樣唔得，嗰樣又Book唔到，你會點形容呢件事？呢三間公司，佢哋就聽投資推廣署推銷，真係做咗投資；結果係點，就係變成一系列「中伏案例」。
最後，睇下投資推廣署嘅簡介：
本署致力引進對香港經濟及發展策略有利的投資，並鼓勵這些投資項目留港發展，一切服務以態度熱誠、重視誠信、專業服務、以客為尊、方便營商及迅速回應為原則。
本署服務海外及內地企業，助其在香港開業或拓展業務，客戶涵蓋中小企業以至大型跨國公司，從業務籌劃以至開張擴展各個階段，均免費提供專業意見及支援服務。
千頌C
http://www.fb.com/winbigwok
本欄逢周三刊出
千頌C
收市閒情 - 千頌C 舊文
來源 source: http://hk.apple.nextmedia.com