納米樓繼續有得做
2017年10月13日
外圍股市觀望美國聯儲局主席人選同議息報告，變化唔大。港股喺10年高位徘徊，上下打底，中環茶友隔咗一日消化吓《施政報告》，焦點仲係房策。
《施政報告》公佈，原先吹得好大嘅中產上車盤同農地發展着墨唔多，令原先期望好高嘅地產股回晒塘。有中環茶友睇完後，就覺得雖然報告無大講農
地發展，但整體方向都算對樓市友善，所以地產股調咗落嚟之後，噚日開始企番穩。
《施政報告》對樓市友善
日前社會焦點放咗喺中產上車盤，上車係依家樓市主力，所以發展商好多都集中起納米樓，有人擔心若然當局大推上車盤，會搶走咗呢個剛需最強嘅用家市場。報告話會喺出年搞個先導計劃，先推1000個單位，咁即係未來兩、三年都見唔到有好多政府上車盤供應。
特首仲話明，佢唔會用公營房屋地起樓，咁即係話要喺起私樓嘅官地或者係發展商嘅土地儲備搵地起資助上車盤。茶友話照咁講，如果無着數嘅話，發展商會唔會拎石頭砸自己隻腳，同政府合作起上車盤呢？
學特首話齋，依家社會興陰謀論，同發展商有偈傾，都會俾人話官商勾結，照咁睇納米樓市場應該唔會畀政府咁快打殘。當政府大力吹風話起資助上車盤，代理老闆即刻有啲面青，撲出嚟大力反對，依家睇嚟係一場虛驚，可見將來代理推銷納米樓嘅生意仍然有得做。幾隻大地產股中，號稱月月有樓賣嘅新地(016) 報收131.9元，升咗1.85%，彈力係最強。
除咗上車盤，《施政報告》話明會用置業主導嘅政策，咁即係幫人買樓。呢個政策會將部份出租公屋轉做綠置居，相信最多會影響天價公屋王，對私樓影響唔大。政府講明想人買樓，加埋依家話考慮放鬆換樓寬限期只得六個月嘅限制，從呢個角度講，可以話係對樓市友善嘅政策。對發展商嚟講，用農地同政府合作起上車盤無乜料，咪索性補地價起私樓，雖然炒起上嚟少咗概念，實際影響就唔係咁緊要。
茶友話，香港樓價貴始終係土地問題，現存可發展土地有限，要發展郊野公園阻力奇大，其他選項唔係咁快可以造地。農地主要落咗喺幾大發展商手上，社會唔想政府同發展商合作，想增加土地供應得個講字。依家政府整個覓地小組凝聚共識，搞得嚟又一年半載，呢個就係政治現實。
中旅資產有價待活化
港股高位觀望氣氛濃厚，恒指全日變動唔大，收報28459，升咗69點；國企指數收報11500，漲88點，成交906億元。金融股個別有表現，中國平安(2318) 急升2.8%，報63.95元；建行(939) 升1%，收報6.97元。呢排受壓嘅手機設備股繼續有拋售，舜宇光學(2382) 急跌4.6%，收報121.6元。
黃金周後，香港中旅(308) 股價炒上咗。早前集團透露唔少大計，包括正研究將部份成熟項目分拆上市，最有機會成事嘅係景區業績，由於法例規定門票業務唔可以單獨上市，故有可能加入交通資產。若果分拆上市，會考慮喺A股上市方便項目融資。另外公司喺香港有唔少物業資產，早前傳出有意放售旺角中旅社舖位，同時紅磡倉庫將改建成酒店，預計可以帶來可觀收益，兩年後入帳。
對於公司大計多多，中金公司發表報告話，集團新任行政總裁訂下新盈利目標，有助尋求進一步發展，而且該行認為集團香港物業價值有待發掘，估算潛在價值近150億元，好接近佢嘅市值162億元，當中旺角商廈係潛在可出售資產，一旦出售可望派特別息。
中旅股價喺炒資產概念下，一度升8.6%，見3.03元創21個月新高；收報2.97元，升6.5%。
陸羽仁
金融High Tea 舊文
來源 source: http://hdfin.stheadline.com