派錢有路捉
2017年10月25日
港股呢排無乜力，但弱市之中都有奇葩。大型內房股爆上之餘，又有中資股有派錢動作。中國糧油控股(606) 昨公告，以總代價85.79億元向母公司旗下的中糧生化投資出售生物燃料業務，出售的公司從事生產及銷售玉米燃料乙醇及其他生物燃料業務。交易完成後，可以為糧油食品及品牌消費品業務未
來發展提供資金，以及償還部份銀行貸款，優化資本結構。同一時間，集團仲明言擬向股東分派特別股息每股0.2元至0.3元，合共約10億元至16億元，稍後將由董事會釐定特別股息的實際金額。
中糧控股好有息誘味道
對於呢次交易，有中環茶友就話，今次出售金額都幾大，公司話明會派息，似乎好想成事。不過，中央早前講明要加強使用生物燃料，中糧呢項生意好有概念喎，點解係呢個時候要出售呢？正路睇，母公司可能係想理順業務，方便大搞，但如果呢瓣掂，咁中糧生化化可能有機會自己上市喎。從佢話明要派錢，似乎係要「息誘」小股東接受喎。
無論小股東係咪贊成出售，但中糧控股股價可能啱啱撞著跌市，只係升左3%，升0.11元，未完全反映佢派0.2元至0.3元特別息，所以如果股價回調，都有一博價值。
茶友仲話，中糧一系有三間公司，呢次唔係第一次派錢，之前同系的中國食品(506) 早前出售葡萄酒業務予控股股東中糧集團，作價51億元，派特別息26億元或每股0.93元，連同早前出售食用油派發特別息2億至3億元合計，則每股派息相等於約1元，股價由此跳升，勁過中糧控股。
至於佢同系另一間公司中糧包裝(906) 又點呢？呢間公司情況似乎有啲唔同，佢較早前入股左內地大型飲品商加多寶約30%股權。加多寶以前用特許經營方式生產王老吉，呢個品牌一度估值去到千億元，後來品牌持有人同加多寶拆夥，兩者打產權官司，最後加多寶勝訴，可以平分產權。中糧包裝本有有國企背景，相信係加多寶肯引入佢嘅原因。
由於中糧包裝好有興趣併購，管理層已表明，由去年開始，中糧包裝的派息比率已由過往的20%提升至50%，今年及往後一段時間相信都會維持這個政策，即使暫時未有新的併購，都不會增加派息。不過，自從買入加多寶後，佢嘅股價表現就幾唔錯，上周五創左5.38元一年新高。集團策略似乎係股價夠強就唔使加派息。
講到上市公司套現派息，陸羽仁早前推介話有高息概念嘅SOHO中國(410) ，又公佈以29.54億元人民幣出售上海凌空SOHO項目。呢個項目唔算好大，但SOHO中國近年有興趣套現派息多過再自己出錢搞項目，所以消息一出，股價逆市升左2.6%，報4.67元。
大型內房夾到唔清唔楚
除左呢啲派錢概念股，昨日大市最叻就係幾隻重磅內房股。融創中國(1918) 創上市新高，收市升4%報41.9元，如果沽空左佢真係俾人夾到唔清唔楚。碧桂園曾大漲逾10%，收報13.38元，升6.7%；恒大(3333) 上揚1.8%，收造31.55元；華潤置地(1109) 則升1.5%，報收24.2元；萬科(2202) 升3.8%，收報27.45元。
至於大市係十九大閉幕之日，低開後走勢反覆，午市一度拗腰倒升50點，午後走勢轉差，更曾挫207點，見全日低位28098，恒指收報28154，跌150點；國企指數收報11405，下滑85點，成交金額899.27億元，應左黨代會閉幕就跌的魔咒。內銀股同樣無運行，建行(939) 收跌0.58%報6.81元；工行(1398) 收跌0.16%報6.15元，兩者合共拖累恒指16點跌幅。
陸羽仁
金融High Tea 舊文
來源 source: http://hdfin.stheadline.com