金手指：可惜冇得Put比特幣
■全球第一隻bitcoin衍生工具喺瑞士面世，即刻成為瑞士交易所成交量第一嘅產品。 資料圖片
周末，孫柏文見Zerohedge報道，話全球第一隻比特幣（Bitcoin）嘅衍生工具出台，買賣亦開始咗。咁有創意，一定唔係香港啦。一睇，確實，瑞士行搞嘅。隻「
紙比特幣」，已即刻成為瑞士交易所成交量第一嘅產品。
不過，原來搞嗰個機構，叫Vontobel，即係早前強勢登陸香港嘅新輪商。原來隻嘢好簡單，一對一咁畀你買bitcoin。即係用金銀市場嘅叫法，可當佢為「紙比特幣」。
有咗呢個基本產品，就可以喺佢上面生出好多衍生工具，最少都有call、put輪、牛熊證。
當然，呢隻「紙比特幣」我都諗過，甚至話香港應該有人會搞個比特幣ETF。點知，喺呢單「紙比特幣」面世新聞後，我明查暗訪，發現香港冇可能出現呢啲產品。
阻力位喺邊？咪又係證監、港交所、政府一大抽監管機構。有個搞開衍生工具嘅人，甚至話香港如果係第一個有得買賣比特幣call put輪的話，佢「切」（雖然佢係女人，唔知可切啲乜）。
點都好，萬事俱備，東風都有，係差啲budget同headcount多到要搵嘢搞死嘅證監阻住。臨門一腳，將會大量資金湧港炒比特幣衍生工具。對上一次香港有咁嘅盛況，一定係全球發達國家兼共產政權，禁止擁有黃金實貨兼買賣。香港則唔理「國際大趨勢」繼續有得買。
香港一池死水，人信心盡失，是有原因的。可悲。
孫柏文
獨立股評人
http://fb.com/shuen
本欄逢周二刊出
孫柏文
金手指 - 孫柏文 舊文
來源 source: http://hk.finance.appledaily.com