Money Walker：後市還看阿爺取態
■今時今日北水當道，所以中央對北水湧港取態，對港股見頂與否影響極大。 資料圖片
隨住恒指升近三萬點，難免有人將現市況與2007年爆煲前嘅癲升作比較，以本地散戶熱情高低，去衡量港股見頂與否。
今輪升市少年股神未有影，亦唔見
有新嘅財經傳媒誕生，就咁睇散戶情緒的確未到高𥧌。不過與十年前不同，當年升市全靠本地散戶與外資支持，但今時今日北水當道，所以中央對北水湧港取態，對港股見頂與否影響極大。
畢竟國策可以突變，好似最近有傳聞內地叫停港股基金審批，無論事實與否，都提醒大家港股仲有冇得升，其實好關阿爺事。中共十九大前後，的確從多方面採取手段防止資金外流，今後將措施伸延至港股絕不出奇，尤其是A股今年升得唔多，北水有極大誘因來港搵食。
北水受政策左右，對港股後市影響難以預測，咁外資又如何呢？各大行繼續睇好新興市場明年表現，料美國明年頂多加息兩至三次，對新興市場拖累有限，香港亦屬新興市場，加上中資股明年獲多間大行給予「增持」評級，港股理應受惠。但要留意一點，就係港股今年累積升幅唔細，單純從追落後角度睇，外資明年要從新興市場掘金，首選恐怕未必係港股。
不過宏觀而言，筆者傾向相信環球升市仍未告終，因為目前只有美國經濟迎來後周期（late cycle）階段，環球多國仍處於增長初段，中國更有餘裕搞調控，而環球商品價格仍然受控，亦係環球經濟未過熱嘅指標。全球投資氣氛向好下，港股出年未必大升，但論見頂則言之尚早。
El.
http://fb.com/moneywalkerhk
本欄逢周三刊出
El.
Money Walker - El. 舊文
來源 source: http://hk.finance.appledaily.com