【實力取勝】由一個打唔通嘅電話講起（陳承龍）（第155期）
2017-12-14 16:07:25
寫呢篇稿之時，小弟其實喺北海道，但人唔喺香港，稿會繼續寫，the show must go on。
上個星期，真係大風大浪，小弟唔係講大市，而係結好控股（064）同結好金融（1469
），圖表上係靚㗎喎，成交都配合，尤其隻結好金融喺2.2元附近整固咗之後，大成交衝上去2.9元。貨比三家，同行金利豐金融（1031）市值都炒到過1000億，每股盈利（EPS）0.086元，派息0.025元，但係結好金融EPS反而有0.112元，派息0.05元，仲好過金利豐，但市值就只得60億左右，100億都唔夠，完全係唔合理。
正當大家包括小弟覺得結好金融要炒上去之際，12月8日星期五，股價突然跌咗落去喎，「兩母子」喺冇先兆之下無厘頭跌兩成，小弟喺節目中都嚇一嚇，但係好在處變不驚，同大家講2.4元可以撈，星期一返嚟，咪即刻賺錢咯。周五收市後，亦都知道點解結好孖寶升得咁勁，結好金融宣布，同江北區政府及江蘇沙鋼訂立合作協議，主要合作內容包括建設跨境金融投資平台、協助重慶企業走向香港資本市場、引進香港資本參與成立產業投資基金、幫助江北區政府進行人才引進及促進交流。咁點解結好金融會跌？原來當日有傳證監同廉政公署，帶咗某幾間證券行嘅人去協助調查，一時間傳言滿天飛，有人打畀結好老闆洪漢文問兩句，點知佢因為上咗大陸簽約，手機收唔到，人哋打唔到畀佢，以為佢有啲咩事，於事一班自以為消息靈通嘅人，就人踩人咁出貨，搞到1469單日狂插兩成，畫面真係恐怖。後來證明係虛驚一場，錯手沽咗貨嘅人，會唔會揼緊自己心口呢？
講開又講丫，圖太郎星期二晚（12日），失驚無神應fans要求，夜晚做咗一粒鐘《特備節目》，仲有我老友阿正客串，兩條友一問一答，都有超過600人睇。根據同事畀我嘅資料，睇夜晚直播同日頭直播嘅人係兩班人，就好似《特備節目》嗰晚，有好多人留言話第一次Live睇圖太郎做節目，亦都有人話啱啱洗完碗開電腦就睇到，原來呢個時段講股票，先係一個藍海。600話多唔多，但真係唔係少，唔知會唔會未來成為策略王直播室嘅新戰線呢？
實力取勝 - 陳承龍 舊文
來源 source: http://www.winmoney.hk