利字當頭：學有錢人理財習慣
■「富爸爸」哲學當中，筆者唯一唔贊成嘅係佢將地產作為資本呢個概念放到太大。互聯網圖片
有人話，2017年兩個最大遺憾，就係冇買Bitcoin，同埋冇買騰訊（700）。睇返舊年底，好多堪輿學家預測，話今年上半年升下半年跌。結果大家心照。睇得咁準，仲有人返
工咩？2018年就快到，又有冇人夠膽做全年預測呢？
話說高明搞「財毀會」，幾個月前問我有冇興趣。咁好玩，又點可以唔應承？從一開始，我就想試嚇亂咁點，即係所謂嘅Monkey Throwing Darts，睇嚇結果會點。最終一季結算個倉增值四成幾，算係得啖笑。
雖然話燈，但係燈到盡頭便是準。睇返自己亂點鴛鴦譜嘅成績，都只係一半半準，儘其量都只係將背後嘅趨勢放大。假如上一季嘅大趨勢係跌，亂點股票倉嘅回報，應該都係負數。或者好似已故嘅曹仁超前輩話齋，有智慧不如趁勢，與其揀股追逐Alpha，不如睇宏觀經濟捉摸大環境長遠更加有益有建設性。當然，最理想係建立健康嘅個人理財習慣，控制風險同增加收入。
健康理財習慣，最好學習有錢人。曾幾何時好多人鍾情嘅「富爸爸」哲學，講到尾其實係一種以現金流作為計算財富嘅心態；搵到幾多唔係最重要，最重要係剩低幾多。當然，假如你係要用時間同勞力去換取收入，你嘅收入係有限嘅；不過當你嘅收入係建立喺可以放大嘅資本，你嘅收入就可以一步步咁變成資本，最終達到財務自由嘅境界。
「富爸爸」哲學當中，我唯一唔贊成嘅係佢將地產作為資本呢個概念放到太大。事實上，任何可以生財嘅方法，都係資本；而經營資本，亦需要一定嘅投入，要承受風險，而唔係完全被動式坐喺度等收錢。投資同投機最大分別，就係投資係控制成本增加回報，投機就純粹睇價格升跌。投機長遠嘅回報率，一定係負數，蝕嘅就係交易成本。
利世民
http://fb.com/leesimon.hk
本欄逢周二、四刊出
利世民
利字當頭 - 利世民 舊文
來源 source: http://hk.finance.appledaily.com