騰牛回頭已是百年身
2017年12月12日
港股由3萬點急插而下，不過抗跌力比想像中強，原本以為指數升得咁急，應該有機會跌近甚至跌穿28000點，但上個星期尾起恒指開始反彈，昨日再彈325點，再度逼近29000點水平，當中騰訊(700) 、同平保(2318) 急彈，令市場氣氛大有改善。
不過，對炒騰訊相關
衍生工具的股民，咁樣大起大落，就算股價依舊，都可能已經銀紙全飛。
騰訊好友昨日繼續反攻，股價重上400元水平，連帶相關牛證牛輪都回升不少；不過，騰訊呢一輪過山車，由440元高位衝破370元低位，已經震咗好多衍生工具炒家出局，完成咗一次大清洗。有玩開衍生工具的中環茶友，早排喺騰訊熱炒，相關的窩輪同衍生工具交投隨時每日有100、200億元，雖然佢哋轉手率好多，有人一日出出入入幾次，但都反映市況熾烈。呢啲高位發行的牛證，喺月初大插落嚟，已經令好多炒家死咗幾次。
股價依舊 銀紙全飛
茶友話，好似騰訊一隻3萬億市值的大股，可以咁樣上上落落，實在好得人驚。好多股民覺得呢隻巨無霸郁得慢，所以走去玩衍生工具，希望增加回報，點知佢年尾突然咁樣回頭，走避不及全年賺的利潤就嘔番唔少出嚟。有啲人炒衍生工具揀玩牛熊證唔揀窩輪，一來係覺得窩輪要俾溢價，隨著時間過去波幅減少會「縮窩」，計落唔係幾著數；牛熊證唔使俾溢價之餘，槓桿率又高啲，所以改為炒牛證，不過喺呢輪過山車中，如果止蝕走得慢一啲，咁就肯定輸清光。如果高位輸咗唔忿氣再買，隨時再清多一次袋，即使依家騰訊上番400元，甚至之後再彈高啲，但對已出局的炒牛證股民來說，回頭已是百年身，呢啲正係炒衍生工具的代價。
喺未有衍生工具的年代，好多股民會買孖展炒股，通常佢哋的經驗係個市大跌，到佢哋斬完倉就升番，好多人覺得自己特別黑仔。其實佢哋唔係黑仔，而係用孖展買一隻熱股，撞正佢回頭，斬孖展就會令跌勢加劇，到孖展斬完最劇烈拋售完成，股價自然見底回升，呢個係必然而唔係偶然，絕對同黑唔黑仔無關。
依家炒衍生工具，變相同孖展買股一樣，只不過依家炒家唔會直接自己斬倉，而係由牛證死咗發行商做對沖的貨沽埋，沽壓才清。過去好多股民吸收咗孖展斬倉的教訓，都改為實資買股，咁樣回報雖然低啲，但就唔會承受上落市股價依舊，銀紙全飛的慘痛經驗，所以投資者炒衍生工具，都要留意埋發行商殺牛證沽對沖貨的暗湧，遇到炒風熱火朝天之時，就要自己醒定執生啦。
平保滙控攬住炒上
恒指昨日彈升收報28965，國企指數收報11431，上揚142點，成交1092億元。騰訊(700) 表現強勢，收升2.74%，收報404.8元，帶動其他科網股回升，親生仔閱文(772) 收報88.05元，急彈4.05元；眾安在線(6060) 收報68元，升2.5元。宏利資產管理亞洲區(日本以外)股票投資部首席投資總監陳致洲認為，科技股估值屢創新高；不過，最近幾家科企業績已顯示個別企業盈利增長能力有差異，早幾年大力投資科企的私募基金現已覺科技股偏貴，投資者若繼續不問價追入科技股，將會受損失，明年科企巨頭依然值得留意，但就要揀股嚟買。
平保(2318) 急漲3.6%，收報81.2元；喺平保入貨消息下，滙控(005) 都升2.2%，收報78.45元。喺平保旗下基金掃入大笨象股份收息下，兩隻股份的牛證大出風頭，二十隻升得最多牛證中，有9隻係滙控牛證，平保都有1隻牛證上咗榜。
陸羽仁
金融High Tea 舊文
來源 source: http://hdfin.stheadline.com