Money Walker：科技股失勢屬正常
■美國開始迎來經濟後周期階段，科技股受捧程度減低是正常情況。 資料圖片
美國稅改有進展，整體美股理應受惠，不過科技股受稅改惠及程度不如傳統股份，成為估值昂貴嘅科技股借勢調整之藉口。投資者關注嘅係科技股會否從此失勢，舊經濟股
嘅天下是否經已來臨。
過往市場主力熱炒美國少數增長強勁嘅科技股，並視之為投資王道長達數年時間，只因當地仍處於增長初期，但隨住多項強勁數據出爐，顯示美國經濟較預期佳，加上有稅改催化，資金再一味停留於美國科技股並非正常現象。不過由於科技股本身盈利增長唔錯，即使因為投資風格轉換而失勢，筆者相信走勢亦唔會太差。
隨住美國開始迎來經濟後周期階段（Late Cycle），周期股如銀行股、工業股、零售股同資源股，現階段理應發力。資金由集中重倉科技股擴大至買入更多增長敏感股下，科技股受捧程度減低，根本屬於呢個經濟階段下嘅正常情況。要留意嘅係，美國經濟周期行得較環球其他國家或地區前，加上有稅改催化，所以上述新舊經濟板塊輪轉現象暫時主要於美國發生，但擴展至環球其他市場相信不過係時間問題。
最樂觀情況下，美國明年加息預期次數料進一步升溫，全年加息四次應該會成為市場主流睇法，繼而推動資金未來進一步由債券與美國科技股，轉而流入當地金融股與周期股。當經濟進入後周期尾段，受捧股份肯定會愈加上遊，有朝一日市場熱愛資源股嘅程度，甚至可能升溫至與之前對科技股相若之水平，屆時大概就係今輪維時多年嘅美股升市尾聲之時。
El.
http://fb.com/moneywalkerhk
本欄逢周三刊出
El.
Money Walker - El. 舊文
來源 source: http://hk.finance.appledaily.com