金手指：港交所如何見四百
■如果聯儲局同阿爺忽然轉軚，淡倉記得要立即平倉。 資料圖片
上個禮拜一，恒指裂口低開800點後，因北水狂買，跌幅收窄至300點。孫柏文嗰日收市後「金手指」專欄，話喺臨收市前開put，第一站睇跌至50日平均線，即要跌多千七。篇文大約當晚八點喺《蘋果》即時新聞出
，不出兩個鐘頭，已引來過萬點擊。好多人留言，例如「信你分析一成，全家瞓直！」結果？第日跌1,650點。留言區再冇新嘅謾罵。
其實，我係可以寫得好圓滑，話「大市有機會向下整固」等。令少啲人鬧我。不過，《蘋果》叫得撰稿，我就一定要一句一句逆耳嘅忠言咁講。點都好，過幾日我喺FB post咗句「毋忘817」。同絕大多數人講2007年，都係記得「資金自由行、炒上三萬二」。叻啲，就會記得8月17日係「大奇蹟日」。
其實，最要記得係817前數周嘅市況。2007年，恒指卒之升穿2000年萬八高位，7月尾見23500點。不出三周，跌近兩成。就係喺低位出現「大奇蹟日」。嗰日可V型反彈，係因有人知，一，聯儲局嗰晚會由加息周期，一嚇忽然減息。二，之後個交易日有「資金自由行」。當年成手匯控（005）put輪嘅我，喺「大奇蹟日」學到最大嘅教訓，就係聯儲局同阿爺第一嚇嘅出手，會彈到你唔信。
所以，今次你如果學我買跌，記得記得記得，如聯儲局同阿爺忽然轉軚，要即平。因嗰嚇升浪，連港交所（388）都可見四百。幾時？唔知，不過我put緊就會最驚呢樣。
孫柏文
獨立股評人
http://fb.com/shuen
本欄逢周二刊出
孫柏文
金手指 - 孫柏文 舊文
來源 source: http://hk.finance.appledaily.com