【實力取勝】大市跌咩？So What！（陳承龍）（第170期）
2018-3-28 17:25:49
侵侵堅係玩嘢，同中國打貿易戰，加上騰訊（00700.HK）大股東Naspers減持，風聲鶴唳之下，大股氣氛一下子由好轉差，由高位撻落嚟，畀著幾個月前嘅小弟，都應該跌到重傷，不過
呢排細佬我日日執錢，隔日就下晝萬歲請食雞，公司下落樂也融融，因乜搞到咁開心？係因為投資策略變咗。
不過執錢之餘呢，其實都有啲傷㗎，A股轉弱，上個星期四（22日）小弟止咗啲call輪，都輸唔少，好多都價外得好犀利，不過槓桿又吸引，其中有條買嗰時4毫子，沽嗰時2毫時，寫稿時得返7仙咋，不過，輸還輸，唔夠喺其他股上面贏嘅多。因為近排小弟介紹啲股票都唔算差，東盈控股（02113.HK）已經冇大盤沽，修身堂（08200.HK）同壹家壹品（08101.HK）都逆市靠穩，林達控股（01041.HK）直頭「肥壯」，0.43元嘅批股價係「鐵底」，你想佢落返去都難，個市一穩定返，佢又會再次絕塵，大家要記住，保利協鑫（03800.HK）用每股0.67元買佢返嚟，貨又多過大家，買入價又高過大家，驚乜啫？
其實重點係，今轉回調，小弟個倉一啲都唔重磅，仲可以話係輕鬆，大股嘅衍生工具買得唔多，好多都係買十萬八萬股左右，輸極都係幾萬蚊上落，唔會出事，真係冇壓力。小弟經歷過去年12月頭，由30000點跌過28000點個一浪，呢2000點喺衍生工具市場殺傷力都好大，滙控（00005.HK）同比亞迪（01211.HK）嘅輪證都輸到小弟遍體鱗傷，輸咗我800幾萬錢，嗰次真係好傷，係好耐都冇試過咁傷嗰隻傷。好在到2018年1月，慢慢重整旗鼓，由細價股開始炒起，衍生工具都冇玩，因為可以保持自己嘅市場觸覺；去到2月，就係蝕滙控正股同少少窩輪，但皮尾都傷唔到；至於3月，細佬推乜升乜，唔使再講啦嘛？總之呢三個月，上咗一堂，係同直播室觀眾一齊成長。
呢輪得一類股有勢，就係殻股，因為即使貿易戰打到槍林彈雨，一樣要炒，殻嘅買賣會繼續活躍，所以得幾億市值、半新股、業務簡單嘅股票，真係會輪流炒。小弟呢排一褲都係殻股同科技股，一於同大家贏大鑊。
實力取勝 - 陳承龍 舊文
來源 source: http://www.winmoney.hk