Money Walker：特朗普靠玩火拎著數
美國中期選舉今年底舉行，為保共和黨選情，特朗普自然有壓力兌現其競選承諾，重提徵收重關稅。不過此舉只係佢用於北美自由貿易協定談判嘅籌碼，反映生意佬從政，最大原則仲係利益至上，重關稅不過係爭取著數嘅手段。
今次美國槍頭直指加拿
大同墨西哥，貿易戰對中國實際影響有限之下，本港散戶暫可鬆一口氣。但亦唔代表港股可以置物事外，始終貿易戰消息會左右全球市場氣氛，而且任何貿易保護主義措施會都推高物價，導致環球央行被逼加息壓抑通脹，加快今個經濟增長周期終結，間接不利大市。
筆者認為利益行先嘅特朗普，宣佈大範圍對進口美國商品加收重稅嘅機會不大，頂多只為擺姿態而對少數進口商品開刀。所以即使貿易戰未來再度升溫並觸發股市大跌，倘若市場發覺影響範圍有限，大市仍有機會於其後大幅反彈。情況如同兩年前英國脫歐，市場發覺憂慮中嘅脫歐潮未有發生，因而快速消化事件影響一樣。
隨著歐盟擬對美國進口徵收報復性關稅，一場博弈遊戲隨即揭幕。歐美雙方倘堅持企硬唔讓步，將形成雙輸局面，所以侵侵先會喺關稅措施上預留彈性，而非一刀切對所有進口鋼鋁收取重稅，以方便必要時調整談判籌碼，避免玩火玩到一鑊熟。
講返投資市場，全球央行幣策趨緊加上股市估值唔平，市場抵禦壞消息能力明顯轉差。即使經濟基本因素唔弱，有力支持股市跌完又升返，但股市波動性明顯加大，幾個月前嘅大升市似乎較難重演。
El.
http://fb.com/moneywalkerhk
本欄逢周三刊出
El.
Money Walker - El. 舊文
來源 source: http://hk.finance.appledaily.com