阿爺大力夾內房商賣樓
2018年06月29日
港股五窮六絕，創出今年低位，恒指喺期指結算日再插。港股再插，今次唔係賴中美貿易戰，而係話政府可能出一手樓空置稅，搞到人心有啲虛怯，下午有消息話空置稅通過咗行會，指數反而喺壞消息曝光下回升。
政府喺七一前通過一手樓空置稅當係
交功課，消息傳咗好多日，市場本已經消化咗唔少。本來方案話會喺呢個星期二行會通過後宣佈，但因為林鄭臨時上咗北京見領導所以押後咗。昨日又傳由於股市跌得咁緊要，政府可能觀望吓，未必會咁快公佈。去到昨日下午，電子傳媒率先報道話行會已經拍板收稅，同時又將啲私樓地轉做資助房屋，在消息傳出同時，指數就轉跌為升，唔排除喺期指結算完，淡倉趁壞消息食胡計數。
林鄭三招 聊勝於無
睇番今次一手樓徵收辣招稅，由年初《財政預算案》公佈前喺行會打殘咗，依家樓價係咁升，政府先至通過，遲到好過無到。
有地產界話，依家收稅基準係用兩年租金作準，大約等如樓價4、5%，算係小辣。對嗰啲喜歡用唧牙膏方式賣樓的發展商影響較大，對喜歡用貨如輪轉方式賣樓嘅發展商影響較小。
昨日新地(016) 跌0.3%，恒基(012) 跌0.5%，就知道市場都唔覺得呢啲措施有好大影響。
大市係午後反彈，恒指收造28497，回升141點；國企指數收報10868，跌10點，成交1173億元。
大市雖然企穩，但內房股仍有沽壓，碧桂園(2007) 跌2.7%，收報12.4元；恒大(3333) 跌4.6%，收報18.42元；世貿房地產(813) 跌4.8%，收報19.24元；雅居樂(3383) 跌3.9%，報12.4。內房股下滑，表面同大市不明朗或人仔下跌有關，摸吓底其實有具體嘅政策因素係度發酵。
特區政府迫地產商賣樓，呢樣嘢其實同阿爺嘅政策不謀而合。呢排內房股跌得多，有知情大地產商講起，真正原因唔係乜嘢貿易戰、人仔貶值陰影，而係政策因素。
今年大陸樓價表面平靜，實際上係中央規限賣樓價，但上有政策，下有對策，內房商有人減慢推樓，有人用收裝修費等方式變相拉番高售價。中央有見樓價陰陰哋又有上升勢頭，於是再出招。呢啲招數其中之一，係減慢棚戶遷拆。
內地為咗改善社會居住環境，大力清拆類似香港寮屋的棚戶，過程中會對他們作出補償。
這些棚戶就成為置業購買力，阿爺出招就係叫停或減慢地方的棚戶拆遷，等內房商少咗班剛需客戶群，控制需求。
同一時間，中央發叫銀行收緊對內房商的信貸，特別係買地嘅資金，所以內房商近日資金鏈轉趨緊張，借錢息口急升。
阿爺透過兩面施壓，希望逼發展商加快買樓，可以講，阿爺逼內房商賣樓的招數，比特區政府仲要全面同大力。內房股近日跌得多，正係反映資金緊張同成本上升，再深層次啲就係有阿爺逼佢哋賣樓嘅因素。
爆冷股怡園老闆有來頭
呢排有隻創板股爆冷跑出，以「怡園酒莊」為品牌，位於山西的葡萄酒生產商怡園酒業(8146) ，掛牌翌日股價續升，曾飆升1.3倍，收造1.12元，升1.15倍。怡園葡萄酒除咗有一定知名度外，創辦人仲做過投資銀行，依家掛牌，果然係行家一出手，便知有沒有。
陸羽仁
金融High Tea 舊文
來源 source: http://hdfin.stheadline.com