智取大市：技術分析太氾濫？
■美股高位兩連陰，簡單嘅技術分析，成為淡友唱淡嘅切入點。資料圖片
美股市場突然充斥一片不安氣氣，原因係有分析員爭相出嚟講美股將步入熊市急跌五成。點解遲唔出現、早唔出現，係等呢一日一齊出嚟講？淡友們出口唱淡，當然有預備充足理據，但加上簡單技術分析作為唱淡時間的
切入點，牌面命中率高啲。道指高位兩連陰，根據近幾月趨勢，道指可能出現至少1,000點級別嘅跌市，於是就揀呢個做唱淡起點。
技術圖表已經係坊間投資者必備嘅分析方法，破頂就係強勢，跌穿支持位就係弱勢，係人都識用，睇一個圖唔使30秒就知道強弱。當技術分析係人都識用之時，就容易成為陷阱，單單信杯柄就係強烈利好？金斯瑞（1548）6月初形成完美杯柄後，股價亦由30蚊樓上跌返落去20蚊樓下。
喺股市內，越多人用嘅招數就會越唔準，雖然係咁，技術分析仍然係必須兼用嘅方法，只不過同一種技術形態同現象，喺唔同嘅股份，喺唔同嘅市況，要有唔同嘅詮釋。市況好時，成交少而向上突破冇壞，因為證明蟹貨阻力小，向上動力大把在手，仲好過大成交突破。市況差時，成交少而向上突破變成陷阱居多，反而成交大增而向上突破較可信賴。如果一本書睇到老，就好易跌錢了。
晉佳
http://fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.finance.appledaily.com