收市閒情：令騰訊仆直的那一根稻草
■劉央旗下基金喺騰訊跌穿405元水平大手買入，批貨粗略估計輸咗7,000萬！資料圖片
騰訊（700）噚日穿埋360蚊，收市得返355.2元，同1月底高位476.6元比較，足足蒸發1.15萬億元市值！今日大家都分析「700」點解變「7GG」，但發現大家
硬係數漏幾個，所以在此補充。
1）抖音抖親騰訊！係嘅，大陸社交網絡上，騰訊仲係王者，微信月活躍用戶10億，QQ月活躍用戶為8億。不過，當香港玩開fb嘅朋友，都嫌fb冇新意；大陸又何嘗唔會嫌朋友圈悶要搵新嘢玩？說時遲，那時快，大陸就興起微視頻，抖音成為後生仔新寵！
抖音係恐怖嘅，恐怖在你Login後開來睇，每條15秒，碌嚇碌嚇就無聊不知時日過，「嘩！乜我睇咗成大半個鐘啦？！」更恐怖係，隻App紅到你去香港Neway唱K，會有一個分類叫「抖音」，一入去，你就可以唱：「我們一齊學貓叫，一起喵喵喵喵喵」
人一日，就係得24小時，你開得facebook嚟，就唔會開到Twitter；你睇得動新聞，同一時間就唔會開YouTube；你開住抖音，就唔會開騰訊啲Game、唔會開朋友圈。目前，抖音國內的日活用戶突破1.5億，月活用戶超過3億，「唓！人數同微信差大截，驚咩？」唔驚？唔驚騰訊就唔會封殺抖音嘅小程序啦！
2）黃大仙唱淡！真係求神求神，誠心禮佛來求靈神！你話係咪邪先，農曆年初三，蘋果搵沈大師去黃大仙廟幫騰訊求籤，點知求得下下籤「嶽飛遇害」，嶽飛點死？咪十二道金牌召佢回朝，最後以莫須有罪名判死！
至於騰訊，喺農曆年前，連續13個月出現陽燭，偏偏去到2月就斷纜現陰燭，之後股價反覆跌到今時今日一仆一碌，中間負面消息，先有中史批《皇者榮耀》荼毒青少年、之後有大股東Nasper沽貨、遊戲業務業績差過市場；內憂都唔夠，仲要加埋美國科網股唔掂，700俾人踩多一腳……負面因素加埋加埋，去到出年農曆年，分分鐘集齊「十二道金牌」，點止打殘700，隨時連嶽飛都召得翻生呀！
3）講到騰訊冧價最後一根稻草，一定係「中國女股神」西京投資主席劉央！佢今年4月講明，騰訊係旗下基金最大重倉股，仲話睇好股價上1,000蚊！女股神當然唔係得個講字，當時佢話，基金喺騰訊跌穿405元水平大手買入，單日投資額高達6億元！如果股價跌到去呢個位，佢都一股冇沽，非常粗略咁估計，即係佢呢批貨已經輸咗7,000萬！
by千頌C@堆填區
http://fb.com/winbigwok
千頌C
收市閒情 - 千頌C 舊文
來源 source: http://hk.finance.appledaily.com