金手指：俄鋁十蚊不是夢
■如果用俄鋁對上十二個月嘅業績計，去到十蚊，市盈率都仲係11.5倍。 資料圖片
開市前，俄鋁（486）公佈咗佢哋嘅上半年業績。就算喺四月，美帝無啦啦話要（一拖再拖）咁制裁，盈利都升一倍。唯一瑕疵係唔派息。
如果用2017年下半，加今年上半年，用業績後第一個交易日
收市價計，市盈率得番2.63倍。時見到啲神奇低市盈率，好多都係因利潤包含好多「水份」。不過，俄鋁係實數。
點解頭上有把美帝大關刀，都可以有咁大嘅盈利升幅？原因有如孫柏文十幾年前撈石油股分析員嘅第一份報告中講過，資源股有如一張永冇到期日嘅資源call輪。當生/資源要10蚊，市價係11蚊嘅時候，就賺1蚊。不過當市價升到12蚊，如果成本唔變，盈利就係2蚊，升一倍。
早前嘅文章，我都講過話我啲探子滙報話俄鋁冇停過產，而囤積咗嘅產品，亦好快搵到方法運出。而客戶因為嚇親，驚冇料要停產，所以佢哋成條生產線都囤多咗鋁。仲有，全球產鋁最大國係大陸，原因係燒大量煤炭，造大幅補貼嘅電，去產蝕大本嘅鋁。等鋁廠有現金流去還亂借嘅增產能貸款。習大大最驕傲嘅政績，就係改善空氣汙染，首要任務，打胡亂借貸。所以舊年大陸已大力打鋁產能，唔覺今年會變。
見本報數月前訪問過隱世青衣股神，佢都係一注獨贏買俄鋁。仲話十蚊一股不是夢（現價2.3元）。如果用對上十二個月嘅業績計，去到十蚊，市盈率都仲係11.5倍。雖然我有感覺俄鋁大股東唔會向美帝屈服，呢個制裁一拖再拖可能維持好耐，甚至以年計。不過希望隱世青衣股神又攻下一城。
孫柏文
獨立股評人
http://fb.com/shuen
本欄逢周二刊出
孫柏文
金手指 - 孫柏文 舊文
來源 source: http://hk.finance.appledaily.com