大棋局：A股及人民幣短期見底
■上證2600點大約係現時A股嘅死線，一穿斬倉就止唔到瀉。 資料圖片
A股同人民幣短期應該見底。先講A股，大陸官方2015年A股股災得到嘅教訓係，狂借孖展同放任股權質押會玩死自己。事關現時內地人行事方式，鬱嚇就有今生冇來世，嚇嚇去到盡，
因此現時A股孖展同股權質押都比過去管得嚴。兩者之中尤以股權質押更大鑊。
股權質押，即係上市公司老闆拎自己公司股票去抵押借錢。截至8月3日，A股上市公司共有3,633間，其中97%上市公司老闆都拎自己檔股票去抵押借錢。早前上證逼近2600點，有2%上市公司於高位時，已經將50-100%股票抵押借錢。所以2600點大約係現時A股嘅死線，一穿斬倉就止唔到瀉。
故此內地監管部門叫證券行唔可以隨便斬倉，斬倉前要先通知。咁搞法即係要證券行硬食，但可見呢條係近期死線，能力可控時，都唔會畀佢穿。所謂近期，因上市公司老闆每日都會被不同方法提醒佢還錢，上述數據每日變動。
至於人民幣，8月6日開始，人民銀行將遠期售滙業務嘅外滙風險準備金率由0升到20%。做生意唔想因為滙價波動而損失，會同銀行做外滙遠期合約鎖價，比如一年後以協議好之滙價買入外滙。外滙風險準備金率0%，即銀行做每一單遠期合約都唔需要有外滙做準備金，可以合約到期前先買入外滙；準備金率20%，即銀行根據上個月做嘅遠期合約規模，要留20%外滙做準備金。
人行料穩定滙價
由於銀行要預留或買入外滙做準備金，而外滙準備金冇利息，變相銀行成本提高，銀行就會提高滙價之價差去填數。滙價唔靚仔有兩個效果，其一，想買外滙嘅人會買少啲或等一等；其二，短期內人民幣滙價會稍微硬淨。短期嘅意思，係一兩個月。
每年4月同10月，美國財政部會公佈《美國主要貿易夥伴外滙政策報告》，決定是否將某國列為滙率操控國。報告根據三個條件嚟審：一、貿易夥伴對美國的貿易順差超過200億美元；二、經常賬順差佔國內生產毛額（GDP）比率超過3%；三、持續性進行單向外滙市場幹預，且年度內重複進行淨外滙購買之金額超過GDP的2%。
條件一，中國符合；條件二，根據美國財政部4月數據，中國此數值為1.4%，不符合；剩落嚟就係睇條件三。因此人民銀行嘅動作，係10月前稍微穩定人民幣滙價。特朗普宣佈抽中國關稅後，人民幣跌咗差唔多10%，結果美國由10%關稅加到25%。人行嘅動作，說明費事10月多樣嘢頭痕。
Mr. Tregunter
本欄逢周二刊出
Mr. Tregunter
大棋局 - Mr. Tregunter 舊文
來源 source: http://hk.finance.appledaily.com